«Smartfon — TikTok-qa telmiretin qural emes»: Prezıdent zamanaýı tehnologııamen kásipti dóńgeletýdi tapsyrdy
ASTANA. KAZINFORM — Tsıfrlandyrý men JI Qazaqstan azamattarynyń turmysyn jeńildetip, tabys tabýǵa múmkindik berýi kerek. Bul týraly Qasym-Jomart Toqaev Táýelsizdik saraıynda ótken brıfıngte tapsyrma berdi.
Jýrnalıst Memleket basshysynyń jasandy ıntellektini Qazaqstannyń jańa ekonomıkalyq modeliniń negizi retinde ataǵanyn eske salyp, «Tsıfrlandyrý jáne jasandy ıntellekt jyly» aıasyndaǵy mindetterdiń oryndalýy jáne tsıfrlyq tehnologııalardyń azamattardyń kúndelikti ómirine áseri týraly suraq qoıdy.
Óz kezeginde Prezıdent Qazaqstannyń tsıfrlyq memleket qurýdyń alǵashqy kezeńinen ótkenin atap ótti.
— 2026 jyl Tsıfrlandyrý jáne jasandy ıntellekti jyly dep jarııalandy. Joldaýda osy taqyrypty qozǵaımyn. Biz tsıfrlyq memleket qurýdyń, ıaǵnı tsıfrlyq qyzmetter usyna alatyn memleket bolýdyń alǵashqy kezeńinen óttik. Ózge eldermen salystyrǵanda ómirimiz áldeqaıda jeńildedi. Muny ózderińiz de kórip, baıqap júrsizder. Qazir kóp sharýany úıden shyqpaı-aq sheshe alasyzdar. Buryn munyń bárin retteýge ýaqyt jumsap, taban tozdyrýǵa týra keletin. Sondyqtan tsıfrlyq servıs kórsetetin memleket retinde qalyptasý qajet boldy, — dep túsindirdi Memleket basshysy.
Qasym-Jomart Toqaev Úkimetke alǵashqy satyda qalyp qoımaı, halyqaralyq kelissózder júrgizý jóninde tapsyrma bergenin jetkizdi.
— Tsıfrlandyrý men jasandy ıntellekt halyqqa, elimizdiń barsha azamatyna qyzmet etýi kerek. Qarapaıym tilmen aıtqanda, smartfon — ermek úshin ustap, erteden keshke deıin TikTok-qa telmiretin qural emes. Smartfonmen aqsha tabýǵa bolady. Máseleni osylaı tótesinen qoıǵan jón. Ásirese, bul sharýalarǵa kerek. Olar aýyl-aımaqtan shyqpaı-aq kásibin júrgizýge zamanaýı tehnologııany paıdalana alady. Aldaǵy ýaqytta Úkimet dál osy mindetti oryndaıdy, — dedi Qasym-Jomart Toqaev.
Buǵan deıin Qasym-Jomart Toqaev «Vıtse-prezıdent kim bolady?» degen suraqqa jaýap bergen edi.
Sondaı-aq Memleket basshysy Úkimettiń otstavkaǵa ketetinin jáne quramynda birqatar ózgeris bolatynyn málimdedi.
Qasym-Jomart Toqaev Quryltaı depýtattaryna úsh talap qoıdy.
