Smartfon — qymbat oıynshyq emes: Elde tsıfrlyq jumys isteý quqyǵy jeńildeıdi
ASTANA. KAZINFORM — Úkimet jyl sońyna deıin tsıfrlyq jumyspen qamtýdy retteıtin jeńildetilgen quqyqtyq rejım ázirleıdi. Bul týraly Memleket basshysy Qasym-Jomart Toqaev Halyqqa Joldaýynda aıtty.
Prezıdenttiń aıtýynsha, JI-di kommertsııalyq maqsatta paıdalaný, aktıvterdi tokendeý, blokcheın tehnologııalary men tsıfrlyq platformalyq ekojúıelerdi damytý jumystary endi ǵana qolǵa alynyp jatyr.
Sondyqtan tsıfrlandyrý múmkindikterin ekonomıkada naqty qoldanýǵa arnalǵan baǵdarlama ázirleý qajet.
— Búginde mıllıondaǵan azamatymyz marketpleısterdi paıdalanyp, tamaqqa tapsyrys beredi, taksı shaqyrady jáne basqa da kóptegen qyzmetke júginedi. Onyń ishinde bank qyzmetteri de bar. Bul baǵytta Qazaqstan talaı ozyq elden alǵa shyqty. Alaıda munymen toqtap qalmaı, alǵa júrý kerek, — dedi Memleket basshysy.
Prezıdenttiń pikirinshe, Qazaqstanda ónimdiligi joǵary tsıfrlyq ekonomıkany damytýǵa qajetti barlyq alǵyshart bar. Jastar bilimdi ári shyǵarmashyl, ınternet qoljetimdi, tsıfrlyq ınfraqurylym qalyptasqan.
Qazir kez kelgen azamat birneshe mınýtta bank shotyn ashyp, bólip tóleýdi rásimdeı alady nemese úıden shyqpaı-aq taýar satyp alady. Endigi kezeńde tsıfrlandyrýdyń maqsaty qyzmetterdi qoljetimdi etýmen shektelmeı, ár adamnyń múmkindigin keńeıtýge baǵyttalýy kerek.
— Bizge paradıgmany ózgertip, aldymyzda turǵan mindetterge basqa qyrynan qaraý qajet. Basty maqsatymyz — halyqtyń ıgiligine qyzmet etetin tsıfrlyq ekonomıka qurý. Qoǵam ınternetti tek aqparat tutynatyn, kóńil kóteretin orta emes, jańa dúnıeler jasap, eńbek etýge múmkindik beretin keńistik retinde qabyldaýy kerek. Smartfon azamattarymyz úshin ýaqyt ótkizetin qymbat oıynshyq emes, tıimdi jumys quralyna aınalýǵa tıis. Osyǵan baılanysty Úkimet jyl sońyna deıin tsıfrlyq jumyspen qamtýdy retteıtin jeńildetilgen quqyqtyq rejım ázirleıdi, — dedi Prezıdent.
Buǵan deıin Prezıdent sharýalardy ınvestıtsııalaıtyn pármendi tásil engizýdi tapsyrǵan edi.
Ol Balqash AES qurylysyn keler jyly bastaýdy usyndy.
Sondaı-aq Qasym-Jomart Toqaev Qazaqstannyń tranzıttik áleýetin synǵa aldy.
