«SmartAstana» qosymshasyndaǵy pikirlerden Astana dárigerleriniń reıtıngi jasalady
ASTANA. QazAqparat - «SmartAstana» mobıldik qosymshasynda turǵyndar qaldyrǵan pikirler negizinde Astana dárigerleriniń reıtıngi qurylatyn bolady, dep habarlaıdy QazAqparat.
Astana ákimdiginen málim etkendeı , mundaı tájirıbe bilim berý salasyna da qoldanylady dep josparlanýda.
Densaýlyq saqtaý salasyn tsıfrlandyrý jónindegi jańalyqpen qala ákiminiń orynbasary Malıka Bekturova bólisti.
«Jaqynda «SmartAstana» qosymshasynda «dáriger reıtıngi» fýnktsııasyn qostyq. Ony jasaý óte ońaı: kabınetterdiń esigindegi QR-kodty skanerleý jetkilikti. Kezek kútip turǵanda nemese dárigerdiń qabyldaýynan shyqqanda siz telefonyńyzdaǵy «SmartAstana» qosymshasyn ashasyz, QR-kodty skanerleısiz, osy kabınette qabyldaıtyn dárigerler týraly aqparatty kóresiz, sodan soń dárigerdiń jumysyna baǵa berý nemese pikir qaldyrý tetigin tańdaısyz», - dedi ákimniń orynbasary.
Medıtsınalyq uıymdardyń reıtıngi de osylaısha qalyptasady.
Malıka Bekturovanyń aıtýynsha, barlyq shaǵymdar jedel qarastyrylady jáne tıisti sharalar qoldanylatyn bolady. Saýalǵa berilgen jaýap «SmartAstana» qosymshasyndaǵy jeke kabınetke túsedi. Naýqastardyń tilekteri men usynystary jınaqtalyp, medıtsınalyq mekemeniń jumysynda esepke alynady.
«Bul óte jaqsy, jetkilikti túrdegi obektıvti keri baılanys. Onyń qoldan jasalǵan «laık pen kommentarııler» emes, tirkelgen qoldanýshylardyń shynaıy pikirleri ekenin bilemiz»,- dedi ol.
Reıtıng naqty ýaqyt rejıminde qalyptastyrylady. Ákim orynbasarynyń sózinshe, ol áli kópshilikke jarııalanbaǵan, Qoǵamdyq densaýlyq saqtaý basqarmasyna arnalǵan jáne medıtsınalyq mekeme men onyń qyzmetkerleriniń jumysyn baǵalaý úshin qoldanylady.
«Biraq, jarty jyldyń nemese bir jyldyń qorytyndysy boıynsha eń úzdik nemese keń tanymal dárigerler týraly aqparat halyqqa jarııalanady dep oılaımyn»,- dep qosty ákim orynbasary.
