SmartAlmaty jobasy kúzde tanystyrylatyn boldy
ASTANA. QazAqparat - 30 maýsym kúni Almatydaǵy Atakent -Ekspo kórme ortalyǵynda tsıfrlyq ınnovatsııalar taqyrybynda VI Innovatsııalyq forým ótedi, dep habarlaıdy «QazAqparat» HAA tilshisi.
«Forýmda álemniń bedeldi sarapshylary qaladaǵy ózekti máselelerdi sheshý úshin ınnovatsııalyq tehnologııalardy qoldaný máselelerin talqylaıdy. Biz Memleket basshysynyń tapsyrmasy aıasyndaǵy «Tsıfrlyq Qazaqstan» baǵdarlamasyn júzege asyrýǵa tyrysamyz. Sondyqtan, qala turǵyndary tap bolatyn máselelerdi jedel sheshýimiz kerek», - dedi Almaty qalasy Kásipkerlik jáne ındýstrııaldy-ınnovatsııalyq damý basqarmasynyń basshysy Almas Mádıev forýmǵa arnalǵan baspasóz máslıhatynda.
Sondaı-aq, Mádıev qaladaǵy jaılylyq pen qaýipsizdik deńgeıin kóterýge baǵyttalǵan SmartAlmaty jobasynyń júzege asyrylý barysy týraly áńgimeledi.
«SmartAlmaty jobasy áli de júzege asyrylý kezeńinde. Ózderińiz bilesizder, qalamyzda keleshekke arnalǵan zertteýlermen aınalysatyn Almaty Damý ortalyǵy jumys isteıdi. Qazirgi ýaqytta jobany júzege asyratyn oryn men aqparattyq platforma týraly ýaǵdalastyqqa qol jetkizdik. Bul barlyq máseleni jyldam sheshý úshin jáne Almaty qalasynyń turǵyndarymen keri baılanys ornatý maqsatynda jasalǵan», - dedi Mádıev.
«Tujyrymdamasy anyqtalǵan jáne biz atalǵan baǵytta mol tájirıbe jınaqtaǵan IDC kompanııasymen seriktestikte jumys istep jatyrmyz, - dep jalǵastyrdy ol.
«Aldyn ala keshendi zertteýler júrgizip, shynynda da Sıngapýr sııaqty álemdik qalalardyń tájirıbesin engizý qajettigin anyqtadyq. Biz álemdik tájirıbeni zertteý ústindemiz jáne bul format bıylǵy qyrkúıek-qazan aılarynda ashylady. Meniń oıymsha jyl aıaǵyna deıin daıyn bolǵan jobany sizderge tanystyramyz».
Almaty qalasy Kásipkerlik jáne ındýstrııaldy-ınnovatsııalyq damý basqarmasynyń basshysy Almatyda ınnovatsııalyq sheshimderdi qoldanýǵa arnalǵan aýqymdy alań bar ekenin atap ótti, munda 80-nen astam ǵylymı-zertteý ınstıtýttary, 38 JOO bar jáne 130 myń stýdent bilim alady. Onyń pikirinshe, jańalyq ashýshy ınnovatorlardyń 87%-i Almaty qalasynda turady.
Aıta keteıik, 2017 jyldyń 30 maýsymynda Almatydaǵy Atakent -Ekspo kórme ortalyǵynda VI Innovatsııalyq forým ótedi. Forýmda Indýstrııa 4.0 tujyrymdamasy, sandyq ekonomıka, ınnovatsııalyq ekojúıelerdi qurý jáne Smart City tehnologııalaryn engizý talqylanady. Bıylǵy forýmnyń taǵy bir jańalyǵy, robottyń forýmǵa spıker retinde qatysýy bolmaq.
