«Smart Zholy»-nyń nátıjesi qandaı

NUR-SULTAN. QazAqparat - Qazaqstan Respýblıkasynyń Tuńǵysh Prezıdenti - Elbasy qory «Smart Zholy» baǵdarlamasynyń nátıjesin jarııalady. Atalǵan bastama aıasynda úzdik startaptar anyqtalyp, Sıngapýrǵa joldanady. Sol jerde venchýrlyq kapıtaldy tartýǵa múmkindik bar, dep habarlaıdy QazAqparat tilshisi.

«Ótken jyly «Smart Zholy» kómegimen qazaqstandyq Intellection startapyna sıngapýrlyq qordan venchýrlyq ınvestıtsııa tartyldy. Webtotem startapy Ońtústik-Shyǵys Azııadaǵy úzdik startaptardyń ondyǵyna qosyldy jáne «Kásiporyndardy baǵdarlamalyq jaǵynan qamtamasyz etý úshin» sanatynda top jardy. Budan bólek, «Smart Zholy»-na qatysqan «Nommi» komandasy ınvestıtsııa tartty. Kompanııa saıahattaýshylar úshin roýter daıyndaıdy. Ol arqyly adam ár kezde baılanysta bolady jáne roýmıng úshin qosymsha aqy tólemeıdi. Bul ónimdi AQSh, Sıngapýr, Germanııa, Avstralııa, Kanada, Ulybrıtanııa, Gonkong, Shveıtsarııa, Malaızııa jáne taǵy basqa elderdiń azamattary qoldanady», - delingen qordyń resmı habarlamasynda.

Aıta keteıik, búgin Nazarbaev Ortalyǵynda «Smart Zholy» baǵdarlamasynyń kezekti jeńimpazdary marapattaldy. Endi, olar da ózderiniń ınnovatsııalyq jobalaryn Sıngapýrda tanystyra alady.

Bıylǵy irikteýden 20 komanda (Otbasy, Smartremont, Opera Build, Metrobot, Sagrad Forms, Pythonist, Easy Sales, BIM Cost, Q Bit, MobyDev, Foxout, Tastamat, Turaqshare, Botbek, Maintender, Verigram, KPRG, GoCode, We'Q, Biometric) ótken bolatyn.

Al aqtyq synda qazylar alqasy úzdik 10 komandany anyqtady. Olar - «Sagrad Forms», «Opera Build», «Turaqshare», «Pythonis»t, «Tastamat», «Verigram», «Biometric», «Otbasy» jáne «Q-Bit», «GoCode». Atalǵan komandalar 23-24 mamyr aralyǵynda Sıngapýrde ótetin Echelon Asia Summit startap-alańynda óz jobalaryn Azııanyń aldyńǵy qatarly venchýrlyq qorlary men korporatsııalaryna tanystyratyn bolady.