Smart jaryqtandyrý: Almaty kóshelerine LED shamdar ornatylady
ASTANA. QazAqparat - Smart jaryqtandyrý jobasynyń tóńireginde Almaty qalasyndaǵy 50 shamǵa LED jaryǵy ornalastyrylady. Bul týraly AQ «Almaty qalasyn damytý ortalyǵynyń» ókilderi málimdedi, dep habarlaıdy QazAqparat.
«Aldaǵy ýaqytta qaladaǵy 50 shamǵa LED sáýleler qondyrylady. Nátıjesinde, qaladaǵy elektr energııasy únemdeletin bolady», - dedi ókil.
Buǵan qosa, aımaqtaǵy 5 aýdan aqyldy jaryqtandyrýmen qamtamasyz etiledi. Atap aıtqanda, Alataý, Jetisý, Medeý, Naýryzbaı jáne Túrksib aýdandarynyń kósheleri.
«Aımaqtaǵy jaryqtandyrý jumysynyń aýmaǵy 137 km-di quraıdy. Oǵan Alataý, Jetisý, Medeý, Naýryzbaı, Túrksib aýdandary kiredi. Al, 2020 jylǵa deıin taǵy 185 km qamtıtyn kóshelerge shamdar ornalastyrylatyn bolady», - deıdi Almaty qalasyn damytý ortalyǵynyń qyzmetkeri.
Qazirgi tańda óńirdegi kósheler, saýda ortalyqtary men mektepterge 115 myńnan astam beınebaqylaý qurylǵysy qoıylǵan. Bul óz kezeginde qaladaǵy kólik qozǵalysyn baqylap, taldap otyrady eken.
Aıta keteıik, óńirdegi «Aqyldy qala» kontseptsııasy «Almaty - 2020» baǵdarlamasynyń aıasynda anyqtalǵan bolatyn. Jobanyń maqsaty - qaýipsizdikti arttyryp, ınfraqurylymdy damytý. Sondaı-aq, qoǵam ómiriniń barlyq salasyndaǵy máselelerdi sheshý. Al, qaýipsiz qala jobasy boıynsha aımaqtaǵy alǵashqy ister 2012 jyldan bastap júzege asyryldy. Sonyń biri Koreı kompanııasymen aradaǵy kelisim. Nátıjesinde, qalaǵa 105 vıdeo fıksatsııa kameralary ornatylyp, jol erejesin buzǵandar týraly málimetter jınaqtalǵan. Budan memleketke 20 mlrd teńge kóleminde tabys tústi.
