Smart úıler ómirimizdi jeńildete me - Vox
NUR-SULTAN. QazAqparat - Búgingi tańda naryqta smart úıler men úıge qajetti «aqyldy» qurylǵylar sany artty. Vox basylymy smart úı adam ómirin rasymen jeńildete me degen suraqqa jaýap izdep kóripti.
«Amerıkalyqtardyń besten úshi úılerine aqyldy qurylǵylar ornatqan. Olardyń kóbi kúnińizdi josparlap, ne isteý kerektigin esińizge túsirip turady. Mamandardyń aıtýynsha, bıyl 862 mıllıon ıntellektýaldy qurylǵylar satylady dep josparlanyp otyr. Bul 2018 jylmen salystyrǵanda 25 paıyzǵa kóp», - deı kele avtor «Bul qurylǵylar rasymen adam ómirin jeńildete me?» degen suraqqa jaýap izdeıdi.
«Aqyldy qulyp, kamera, tútin detektory, aqyldy jaryq qosqyshtar. Bul qazirgi tańda eń kóp kezdesetin aqyldy úıdiń bólshekteri. Bular kúndelikti tirshilikti jeńildete alady. Degenmen, qıyndyq ta týǵyzady», dep jazady avtor. Onyń aıtýynsha, aqyldy qulypty almastyrý óte qıynǵa soǵatyn kórinedi. Tipti, qulypty almastyra almaıtyndyqtan esikti aýystyratyn jaǵdaılar da jıi bolyp turady eken.
«Aqyldy qulyp arqyly adam telefondaǵy arnaıy qosymshamen esiktiń ashyq nemese jabyq turǵanyn kóre alady. ıAǵnı, úıden alysqa ketken kezde alańdamaýǵa múmkindik beredi. Sondaı aq «Eı, Gýgl, jaryqty qos!» dep aıtý arqyly nemese qol shapalaqtap úıge jaryq qosý da keń tarap jatyr. Bul jaǵdaıǵa qaraı yńǵaıly bolýy múmkin. Mysaly, úıge qolyńyz bos bolmaı kirseńiz, jaryqty ońaı jaǵa alasyz. Sonymen qatar mundaı qurylǵylardy ornatý da jeńil ári arzan. Al tútin detektory úıde órt shyqqan jaǵdaıda óte paıdaly. Bul qurylǵylar ómirimizdi óte qatty ózgerte qoımaıdy. Ári bul qurylǵylarsyz da ómir súrýge bolady. Bizdiń qoǵamda biz olarsyz ómir súre alatyn tehnologııalar kóp. Degenmen, aqyldy úıde telefon paıdalaný azaıyp, smartfonsyz ótkizetin ýaqyt artatyny dáleldengen», dep jazady avtor.
