Smart-tehnologııa boıynsha «Órleý» ortalyǵynyń batysqazaqstandyq bólimshesi elimizde jetekshi orynda
ORAL. QazAqparat - Qazirgi tańda smart-tehnologııany paıdalana bilýdiń mańyzy zor. Bul týraly BQO qazaq drama teatrynda «Smart-tehnologııalar: halyqaralyq tájirıbe jáne otandyq praktıka» taqyrybynda Qazaqstan Táýelsizdiginiń 25 jyldyǵyna arnalyp ótkizilgen respýblıkalyq ǵylymı-tájirıbelik konferentsııada aıtyldy.
«Órleý» biliktilikti arttyrý ulttyq ortalyǵy» AQ fılıaly BQO boıynsha pedagogıkalyq qyzmetkerlerdiń biliktiligin arttyrý ınstıtýty (dırektory, pedagogıka ǵylymdarynyń kandıdaty Sofııa Іzmuhambetova) uıymdastyrǵan sharaǵa Qazaqstan ǵana emes, sondaı-aq ózge elderden qatysqan pedagog-ǵalymdar óz oı-pikirlerin ortaǵa saldy.
Jıynda oblys ákiminiń orynbasary Marat Toqjanovtyń atap ótkenindeı, 2013 jyldan bastap qolǵa alynǵan smart-tehnologııalar Batys Qazaqstan oblysynda júıesin taýyp keledi. Buǵan deıin túrli aqparattar negizinen kompıýter arqyly alynsa, endi atalmysh júıe de qoldanysqa engizilip otyr. Munyń, ásirese, bilim salasynda tıimdiligi mol bolmaq. Sebebi kez-kelgen jańa aqparatty jedel ári qolaıly túrde oqý tájirıbesine engizse, odan oqýshy da, stýdent te utady. Saıyp kelgende, kásibı bilim deńgeıi de joǵarylaıdy.
«Órleý» BAUO» AQ basqarma tóraıymy, pedagogıka ǵylymdarynyń kandıdaty, professor Gúlnáz Ahmetovanyń aıtýynsha, konferentsııanyń Batys Qazaqstan óńirinde uıymdastyrylýy tegin emes. Smart-tehnologııa jóninen batysqazaqstandyq bólimshe 17 fılıaldyń ishinde jetekshi orynda. Sol sebepti ózge óńirlerden qatysýshylar mundaǵy tájirıbemen tanysyp, óz usynystarymen bólisse, esh artyq emes. Qazirgi tańda muǵalimder oqý úderisinde smart-tehnologııany, sandyq bilim berý resýrstaryn qoldana bilse, olar óz kezeginde muny oqýshylarǵa úıretedi. Jańa oqýlyqtarmen tanysyp, olardy smartfon arqyly da oqýǵa bolady. Ádistemelik quraldar, onlaın-dárister de (onymen «Órleýdiń» saıty arqyly tanysýǵa bolady) jeterlik.
Konferentsııada Germanııadaǵy valdorf pedagogıkasynyń kýratory, Valdorf mektebinde matematıka men fızıka pánin oqytýdan tájirıbesi mol Aleksandr Shtoltsenbýrg óz elindegi pedagogtardyń biliktiligin arttyrý júıesindegi jańalyqtar men negizgi máselelerdi aıtyp berdi. Onyń sózine qaraǵanda, oqýshylardy smart-tehnologııamen tanystyrýdyń mańyzy zor. Biraq muny tym erte bastaýǵa bolmaıdy, ıaǵnı oqýshynyń jas erekshelikterin de eskerý kerek. Sondaı-aq óz elderinde smart-tehnologııanyń qoldanylýy týraly HAMK qoldanbaly ǵylymdar ýnıversıtetiniń oqytýshysy Sanna Rýhalahtı (Fınlıandııa) men Seýl ýnıversıtetinen Goý Sýn Kvonnyń (Koreıa) beınebaıandamalary da kópshilik nazaryna usynyldy.
Konferentsııa qarsańynda óńirdiń pedagog qyzmetkerlerine arnalǵan «Onlaın kýrstar» jobasy da iske qosylǵanyn aıta ketken jón. Nátıjesinde 4 saǵattyq bes onlaın kýrs túsirilip, saıtqa ornalastyryldy. Aldaǵy ýaqytta osy kýrstarǵa oblys muǵalimderin kezeń-kezeńmen tartý kózdelýde.
Konferentsııa jumystary ınteraktıvti jınaq retinde jaryq kórmek. 
