Smart Point: Túrkistanda memlekettik qyzmet kórsetýdiń jańa formaty iske qosyldy
ASTANA. KAZINFORM — Túrkistan oblysynda memlekettik qyzmetterdi jańa formatta alýǵa múmkindik beretin Smart Point tsıfrlyq keńsesi ashyldy. Jańa býyndaǵy tsıfrlyq keńistik azamattardyń memlekettik qyzmetterdi óz betinshe alýyna jaǵdaı jasap, tsıfrlyq saýattylyǵyn arttyrýǵa baǵyttalǵan. Bul týraly «Azamattarǵa arnalǵan úkimet» memlekettik korporatsııasy» málim etti.
Memlekettik qyzmetterdi endi úırenshikti tsıfrlyq servısterdi paıdalanǵandaı ońaı ári yńǵaıly alýǵa bolady. Mundaı format Túrkistan oblysynyń turǵyndaryna da qoljetimdi boldy — munda jańa býyndaǵy Smart Point tsıfrlyq keńsesi ashyldy.
Smart Point — azamattardyń memlekettik qyzmetterdi óz betinshe alýyna jáne tsıfrlyq daǵdylaryn damytýyna baǵyttalǵan tsıfrlyq keńistik.
— Kelýshilerge yńǵaıly bolý úshin ortalyq birneshe fýnktsıonaldy aımaqqa bólingen: ekspress, tsıfrlyq, saraptamalyq, oqytý jáne demalys aımaqtary. Keńistik jeke kýálik pen pasportty resimdeýge arnalǵan qujattandyrý termınalymen, AlemGPT servısiniń múmkindikteri kórsetilgen aqparattyq ekrandarmen, sondaı-aq memlekettik qyzmetterdi óz betinshe alýǵa arnalǵan monobloktarmen jáne joǵary jyldamdyqty skanerlermen jabdyqtalǵan, — delingen habarlamada.
Buǵan deıin arnaıy HQKO-da daıyndalǵan qujattardy endi úıge jetkizýge bolatynyn jazdyq.
