«Smart Oral» ortalyǵynda azamattarǵa 641 qyzmet túri kórsetiledi
Ashylǵanyna kóp bola qoımaǵan halyqqa qyzmet kórsetý ortalyǵyndaǵy jumystyń tıimdiligine osynda bolǵan Májilis depýtattary Baqtııar Máken, Jeksenbaı Dúısebaev jáne Záýresh Amanjolova kóz jetkizdi.
Memleket basshysynyń tapsyrmalary aıasynda iske qosylǵan atalmysh ortalyqtyń basty maqsaty - memlekettik qyzmetter sapasyn arttyryp, kórsetý merzimin qysqartý, sondaı-aq ákimshilik kedergilerdi joıý. Munda ashylǵannan beri «Bir tereze» qaǵıdaty boıynsha 1600-den astam qyzmet kórsetilgen. Elektrondy qyzmet júıesimen, basqa da qajetti jabdyqtarmen qamtamasyz etilgen ortalyqta turǵyndar ǵana emes, kásipkerlerge qyzmet kórsetiledi. Oǵan qosa quqyq qorǵaý qyzmeti ortalyǵynda prokýratýra ókilderi, medıatorlar men advokattar keńes beredi.
Aldaǵy ýaqytta munda ekinshi deńgeıli bank ókilderin, «Atameken» UKP, «Qazaqınvest» kompanııasy, «Oral» ÁKK» mekenjaılaryn ornalastyryp, jerge jáne sáýletke baılanysty qyzmetterdi kórsetý kózdelýde.
Májilis depýtaty B.Máken ortalyqta turǵyndarǵa kóptegen qyzmettiń bir jerden kórsetiletinin, adamdardyń ár mekemege júgirip júrmeıtindigin, munyń «Tsıfrly Qazaqstan» baǵdarlamasynyń talaptaryna saı keletinin jetkizdi. 
Sol sekildi Májilis depýtaty Z.Amanjolova Oralda kóp keshikpeı avtokólik ıelerine qujat rásimdeýdi jeńildetetin arnaıy qyzmet kórsetý ortalyǵynyń da ashylatynyn, munyń bári halyqqa qolaıly bolýy úshin jasalyp otyrǵanyn atap ótti.