Smart Data Ukimet Qazaqstandaǵy barlyq otbasynyń ál-aýqatyn kórsetedi – Baǵdat Mýsın
«EHealth densaýlyq saqtaýdyń jańa elektrondy arhıtektýrasyna kóshý boıynsha jumystar bastaldy. Azamattar úshin bul ulttyq densaýlyq pasportyn qalyptastyrýǵa múmkindik beredi. Al dárigerge, patsıent jónindegi tolyq aqparatty qoljetimdi etedi. Basty mindet – Densaýlyq saqtaý mınıstrligine baǵynysty uıymdardyń aqparattyq júıelerin biriktirý», - dedi B. Mýsın Úkimet úıinde ótken otyrysta.
Onyń aıtýynsha, osy saladaǵy barlyq aqparattyq júıelerdi Densaýlyq saqtaý mınıstrliginiń «Respýblıkalyq elektrondyq densaýlyq saqtaý ortalyǵyna» biriktirip, Tsıfrlyq damý mınıstrligine baǵynysty etý usynylady. Mınıstrlik osy jobany tehnıkalyq júzege asyrýdy óz mindetine alyp, 2022 jyly 8 modýl, al 2023 jyly 4 modýldy qosatyn bolady.
Sonymen birge, mınıstr Otbasy tsıfrlyq kartasyn engizý jóninde aıtyp berdi.
«Ár túrli memlekettik organdardyń 20 derekqorynan turatyn Smart Data Ukimet platformasynda Qazaqstandaǵy barlyq otbasynyń ál-aýqaty týraly tolyq aqparatty kún saıyn jańartyp otyramyz. Qazir 80 kórsetkish negizinde otbasynyń naqty portreti men táýekelderdi anyqtaý múmkindigi bar. Memlekettiń azamattarǵa kómektesý qajettiligin aldyn ala anyqtap, proaktıvti túrde qyzmet kórsetiledi. Joba osy jyldyń sońyna deıin júzege asyrylady. Biraq bul joba mınıstrlikpen shektelip qana qoımaı, ózge de múddeli memlekettik organdardyń qatysýyn talap etedi, olarmen ıntegratsııa jasaımyz», - deıdi mınıstr.
Odan bólek, «Áleýmettik ámııan» servısi arqyly bala týǵanda beriletin járdemaqy men bala 1 jasqa tolǵanǵa deıin memlekettik tólem boıynsha ataýly áleýmettik kómek kórsetý qyzmetiniń pılottyq jobasy daıyndalýda.
«Bul sheshim halyqty qoldaý sharalaryn tsıfrlyq vaýcher mehanızmi negizinde tolyq esepke alýǵa arnalǵan platforma bolyp sanalady. Barlyq memlekettik qoldaý sharalary osy ámııanda qoljetimdi. Bul joba da jyldyń sońyna deıin iske qosylady», - dedi Tsıfrlyq damý mınıstri.