Smart Data Finance jáne bir shynyaıaq kofe: tsıfrlyq Qarjy mınıstrliginiń jańa múmkindikteri
ASTANA. KAZINFORM - Vıtse-premer – Ulttyq ekonomıka mınıstri Serik Jumanǵarın Qarjy mınıstrliginiń aqparattyq júıe qyzmetimen jáne tsıfrlyq transformatsııa jobalarymen tanysty. Bul týraly Úkimettiń baspasóz qyzmeti habarlady.
Búginde Qarjy mınıstrliginiń aqparattyq júıeleri salyqtyq jáne kedendik ákimshilendirýdi, qazynashylyqty, memlekettik satyp alýdy, strategııalyq josparlaý men aýdıtti qamtıdy. Munyń ishindegi negizgileri – Smart Data Finance (SDF), salyqty avtomatty túrde esepteýge arnalǵan derekterdiń aýqymdy bazasy.
SDF-te 1,9 mln jeke kásipker, 584 myń zańdy tulǵa jáne 20,4 mln jeke tulǵa týraly málimet bar. Munda salyq tóleýshiniń sandyq profıli qalyptastyrylady: múlik, jumys orny, salyq tóleý, AÁK alýshynyń mártebesi týraly aqparat. Zańdy tulǵalarda qosymsha eńbekaqy tóleý qory, qyzmetkerler sany, salyq eseptiliginiń jáne elektrondyq shot-faktýralardyń tarıhy tirkeledi.
Júıe kompanııalardyń iskerlik belsendiligin taldaýǵa jáne olardyń ıeleri arasyndaǵy baılanystardy 15 urpaqqa deıin elestetýge múmkindik beredi. Tusaýkeserde bir qurylys kompanııasy salyqty ońtaılandyrý úshin paıdalanatyn bólshekteý shemasyn kórsetti.
Sondaı-aq býkmekerlik keńseler boıynsha málimetterdi taldaýdyń fýnktsıonaly kórsetildi. Bazada Qazaqstanda jumys istep turǵan barlyq keńselerdiń deregi bar. Onlaın rejımde júıe kún saıyn qazaqstandyqtar jasaıtyn stavkalardaǵy qarajat aınalymyn kórýge múmkindik beredi.
Qarjy mınıstrliginiń AJ damýynyń taǵy bir kórsetkishi-memlekettik qarjynyń tsıfrlyq kartasy nemese «bir shynyaıaq kofe» – salyq júıesine qosylǵan baqylaý-kassa mashınalarynyń (BKM) derekterin vızýalızatsııalaý jobasy. Joba BKM arqyly tirkelgen satyp alýlardy sátte beıneleıtin salyq júıesiniń múmkindigin kórsetedi. Júıe satyp alynǵan zat somasyn, kúnin, ýaqytyn jáne ornyn, meıli ol bir shynyaıaq kofe bolsyn, ne sýpermarketten satyp alǵan taýar bolsyn, belgilenip kórsetedi. Osy aqparat negizinde óńirler boıynsha da, árbir salyq tóleýshi boıynsha da kassalyq tártip saralanady.
Memlekettik qarjynyń tsıfrlyq kartasy óńirlerdiń naqty ýaqyttaǵy kiristeri men shyǵystaryn vızýalızatsııalaýǵa kómektesedi. Júıede 1,1 mln BKM boıynsha derekter kórsetiledi. Salyqtyq ákimshilendirýdiń tıimdiligin arttyrý úshin E-tamga, ISNA, Keden júıeleri iske qosyldy.
E-tamga – QQS balansyn esepteý jáne QQS salyq tóleýshilerdi toqsandyq aǵymdaǵy balans týraly onlaın habardar etý. Negizgi mindet-salyqtardy ońtaılandyrý kezinde qoldanylatyn jalǵan mámilelerdiń aldyn alý.
ISNA – jeti eskirgen sheshimdi biryńǵaı platformaǵa biriktirgen jáne kásipkerlerge tolyq salyqtyq qoldaý kórsetetin salyqtyq ákimshilendirýdiń ıntegratsııalanǵan júıesi.
Keden – kedendik protsesterdi avtomattandyryp, syrtqy ekonomıkalyq qyzmetke qatysýshylardyń qashyqtyqtan ózara árekettesýin engizedi. Munda jasandy ıntellekt elementteri paıdalanylady.
Memlekettik josparlaý júıesinde bıýdjettiń shyǵys bóligi tsıfrlandyrylǵan. Barlyq memlekettik organdar ótinimderdi onlaın qalyptastyryp, kommertsııalyq usynystar men oryndalǵan jumystardyń aktilerin júkteıdi. Bul bıýdjet qarajatyn jumsaýdyń árbir kezeńin – josparlaý men satyp alýdan bastap, tıimdilikti taldaýǵa deıin baqylaýǵa múmkindik beredi.
Memlekettik qoldaýdy baqylaý úshin alýshylarǵa skorıng júrgizetin jáne sharalardyń tıimdiligin qadaǵalaıtyn BAQYLAUDA tsıfrlyq servısi engizildi.
Sondaı-aq taýarlardyń Ulttyq katalogy (ónimdi sáıkestendirý jáne esepke alý úshin biryńǵaı baza), kásipkerdiń Biryńǵaı jeke kabıneti (bızneske arnalǵan «bir tereze» portaly) tanystyryldy.
Tusaýkeser qorytyndysy boıynsha Serik Jumanǵarın bızneske arnalǵan júıelerdiń qolaılylyǵyn arttyrý boıynsha birneshe usynystar berdi.
Aıta keteıik, Jasandy ıntellekt jáne tsıfrlyq damý mınıstrligi quryldy.