«Smart Aqkol» jobasy óz tıimdiligin dáleldedi - Asqar Jumaǵalıev

NUR-SULTAN. QazAqparat - Búgin QR Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev Aqmola oblysynda ornalasqan «Smart Aqkol» aqyldy qala jobasynyń jumysymen tanysty, dep habarlaıdy QazAqparat.

«Búgin áriptesterimmen elimizdiń eń «aqyldy» qalasynda bolyp, «Smart Aqkol» jobasy boıynsha júrgizilip jatqan jumystardyń nátıjelerimen tanystym. Qalany «tsıfrlandyrýdyń» júzege asyrylǵanyna kóp ýaqyt bolmasa da, joba óz tıimdiligin dáleldedi. Sol sebepti jobany júzege asyrýda jınaqtaǵan oń tájirıbelerdi biryńǵaı standartty jetildirý barysynda eskergen jón. Bul bolashaqta qalalardy damytýdyń «smart» prıntsıpiniń maǵynasyn aıqyndap, qandaı da bir túsinbeýshilikterdiń oryn alýyna jol bermeıdi dep esepteımin», - dep jazdy Asqar Jumaǵalıev óziniń Feısbýk paraqshasynda.

Sondaı-aq, mınıstr Aqkóldegi ǵaryshtyq baılanys ortalyǵynyń qyzmetkerlerimen júzdesti.

«Ǵarysh salasyndaǵy qyzmetkerler arasynda urpaqtar sabaqtastyǵynyń kórinisine kýá boldym. Ǵaryshtyq baılanys ortylyǵynyń qyzmetkerlerimen kezdesý barysynda ata jolyn qýyp, áke jolyn jalǵastyrǵan urpaqtardyń kóp ekeni kóńil qýantty», - dedi ol.

Eske sala keteıik, «Smart Aqkol» jobasyn «Qazaqtelekom» AQ, Tengrilab jáne Eýrazııalyq top iske asyrdy. Qalada 17,5 shaqyrym talshyqty-optıkalyq baılanys jelisi tartylyp, qoǵamdyq Wi-Fi jáne LTE jelisi jańartyldy. Osynyń arqasynda 100-ge jýyq beınekamera, 4500 sý esepteý qurylǵysy, 6 myń elektr energııasyn esepteý quraly, jol trafıgi, órt qaýipsizdigi, kósheni jaryqtandyrý jáne basqa da qurylǵylar bir ortalyqtan basqarylady.