Smaqov «Aqtóbe» fýtbol klýby úshin FIFA-dan keshirim suraýǵa daıyn
AQTÓBE. QazAqparat - «Aqtóbe» fýtbol klýby úshin karerasyn aıaqtap, basshylyq qyzmetke kelgen Samat Smakov FIFA-nyń shtab páterine baryp, keshirim suraýǵa daıyn. Bul týraly bas dırektor baspasóz qyzmetine bergen suhbatynda aıtty, dep habarlaıdy QazAqparat tilshisi.
«Aqtóbe» fýtbol klýbynyń jastar quramy oıyndy bastady. Eki týrdan soń úzilis bolady. Klýbtyń bas dırektory Samat Smaqov osy úzilis kezinde bar máseleni sheshýge ázirlenip jatyr. Tipti FIFA-nyń Shveıtsarııadaǵy shtab-páterine baryp, kezdesý ótkizýi múmkin.
«Oıynshylardy tirkeýge tyıym salý máselesin jaqyn ýaqytta sheshý qajet. Eki týrǵa jastar quramasy shyǵady. Úzilis kezinde sheshimin tabýǵa kúsh salamyz. ÝEFA-dan hat keldi. Ol jaqta «Aqtóbe» klýbyna qatysty birneshe shaǵym bar. Olar bizdi jaz aılaryna deıin ustap turady. ıAǵnı, kelesi transfer ashylǵansha ózimizdiń oıynshylar alańǵa shyǵýy múmkin. Qazirgi kezde Shveıtsarııadaǵy FIFA-nyń shtab-páterine barý qarastyrylyp jatyr. Biz jeke kezdesý ótkizip, suraqtardyń bárin sheshýge kúsh salamyz. Tipti jalynyp keshirim suraýǵa daıynmyn. Bul klýb úshin men kóp nársege daıynmyn. Premer-Lıga klýbtarynan úsh usynys túskenine qaramastan men «Aqtóbe» klýby úshin kareramdy aıaqtadym»,- dedi klýbtyń bas dırektory Samat Smaqov.
Eger tyıym alynbasa, jazda ashylatyn ekinshi transferdi kútýge májbúr bolady. Ári klýbpen kelisimshartqa qol qoıǵan qazaqstandyq fýtbolshylar, legıonerler ózge klýbtarǵa jalǵa berilýi múmkin. Al Aqtóbeniń Ortalyq stadıony jańa maýsymǵa daıyn emes. Alańdy jylytatyn qubyrdyń bir bóligi qatyp qalyp, jóndeý jumystary júrip jatyr.
