Smaǵul Sadýaqasulynyń ómirine arnalǵan konferentsııa ótýde
ASTANA. 13 qańtar. QazAqparat - Búgin L.N.Gýmılev atyndaǵy Eýrazııa ulttyq ýnıversıtetinde «Qaıratker Smaǵul Sadýaqasuly jáne Qazaqstan otanshyldyǵy: eldik murat pen jaýapkershilik» atty respýblıkalyq ǵylymı-praktıkalyq konferentsııa óz jumysyn bastady.
Bul shara Qazaqstan Respýblıkasy Táýelsizdiginiń 20 jyldyq mereıtoıy aıasynda ótip otyr.
Memleket jáne qoǵam qaıratkeri, jazýshy, qazaq teatrynyń negizin qalaýshylardyń biri, ulttyq teatrtanýdaǵy alǵashqy eńbekterdiń avtory S.Sadýaqasulynyń týǵanyna 110 jyl, ómirden ótkenine 77 jyl tolýyna arnalǵan osy konferentsııany L.N.Gýmılev atyndaǵy Eýrazııa ulttyq ýnıversıteti, «Alash» mádenıet jáne rýhanı damý ınstıtýty, Qazaqstan tarıhshylary qaýymdastyǵy birlese uıymdastyrǵan.
QR Parlamenti Májilisiniń Tóraǵasy Oral Muhamedjanovtyń konferentsııaǵa qatysýshylarǵa joldaǵan qýttyqtaý haty oqyldy.
Konferentsııa jumysyna QR Parlamenti depýtattary, Astana, Almaty, Qostanaı, Kókshetaý, Qyzyljar, Qaraǵandy t.b. qalalardan kelgen ǵalymdar, aqyn-jazýshylar, mádenıet qaıratkerleri jáne jastar qatysýda.
