Smaǵul Elýbaı: Uly Turan túgel túriktiń armany edi - sol arman aqıqatqa aınala bastady
QR Tuńǵysh Prezıdenti - Elbasy, QHA Tóraǵasy Nursultan Nazarbaevtyń tóraǵalyǵymen ótip jatqan Qazaqstan halqy Assambleıasynyń XXVII sessııasynda jazýshy Smaǵul Elýbaı osylaı dedi, dep habarlaıdy QazAqparat tilshisi.
«Búgin de biz tańqalarlyq tarıhı kúnderdi bastan keship otyrmyz. Óıtkeni, biz prezıdent dál búgin aýysady dep kútpegen edik. Bul oqıǵany erteńgi kúnderden kútetinbiz. Alaıda bári tabanasty ózgerdi. Elbasy prezıdenttik bıligin toqtatty. Bul ózi Elbasynyń jeti ólshep, bir kesken dana sheshimi bolypty. Osy oraıda, keshegi bir sizder ben bizder bastan keshken ótpeli kezeń atalatyn toqsanynshy jyldar eske túsedi. Sol bir almaǵaıyp tusta el batasyn alǵan Elbasy Alla dep táýekeldiń atyna mindi, kósh tizginin qolǵa aldy. Alaıda alda turǵan ótpeli kópir kezeńi ońaı emes edi. Ol kópirdi kóshbasshy bir qadam shalys bassa, shashylyp qalý qaýpi boldy, aǵaıyn. Biraq, Kóshbasshymyz bul ótkelden Qazaqstandy aman esen-alyp shyqty», - dedi jazýshy.
Smaǵul Elýbaı Qazaqstan halqy sol tusta bir atanyń balasyndaı birigip, jańa Qazaqstannyń irgetasyn qalap, qabyrǵasyn kóterip, Arqa tósinde jaınatyp jańa astana salǵanyn atap ótti.
«Qazaqstan Ortalyq Azııanyń kóshin bastady. BUU-da bılik aıtty. Bul bizdiń ata-babamyzdyń óńi túgili túsine kirmegen oqıǵalar edi. Qurmetti áleýmet! Biz búgin taǵy da eńsesi bıik, tóri keń qazaq shańyraǵynyń astynda otyrmyz. Osy ordadan táýelsizdik jyldary zamanaýı saıasat kógine bir juldyz kóterildi. Ol - Nazarbaev juldyzy edi. Ol juldyz kúndiz-túni óz elin shyrqaý bıikke shaqyrýmen boldy. Sol urandardan kúnderdiń kúninde janartaýdaı atqylap, ulttyq passıonarlyq rýh oıandy. Ony oıatqan passıonar tulǵa - Nazarbaev edi. Bul dúmpý taý qoparyp, tas jardy. Jas ári jańa Qazaqstan ómirge keldi», - dedi jazýshy.
Jazýshy óz sózinde osy janartaýdyń ushqyndaryndaı álem kóginde qanshama mádenıet, sport juldyzdary janǵanyn, áli de janyp turǵanyn atap ótti.
«Qurmetti Elbasy! Osy bıikte siz til juldyzymyz jansyn dep jazýdy latyn qarpine burdyńyz. Eń iri reforma - osy edi. Óıtkeni, til juldyzy janǵanda ǵana - el juldyzy janary haq. Endeshe, el juldyzy jansyn desek, til juldyzyn jaǵaıyq, aǵaıyn», - dedi ol.
Jazýshy óz sózinde kınojobalardyń dúnıege kelgenin, ádebı jaýharlarymyz álem tilderine aýdarylǵanyn da atap ótti.
«Sizdiń tapsyrmańyzben túgel Túrki besigi - Túrkistan túleı bastady. Endi bizdi Áziret Sultan basynda, siz kótergen tý astynda túgel túrki bas qosar kúnge jetkizgeı. Uly Turan - túgel túriktiń armany edi. Sol arman aqıqatqa aınala bastady. Sol úshin de sizge alǵysymyz - alabóten. Nuraǵa! Ult tarıhynda - Uly aǵa! Aman-esen júr, Aǵa!», - dedi Smaǵlı Elýbaı.
Eske sala ketsek, elordada QR Tuńǵysh Prezıdenti - Elbasy, Qazaqstan halqy Assambleıasynyń Tóraǵasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVII sessııasy ótip jatyr.
Foto: qazaqadebieti.kz
