SІM Taıaý Shyǵystaǵy jaǵdaıǵa baılanysty konsýldyq kómekti kúsheıtti

ASTANA. KAZINFORM — Elimizdiń Syrtqy ister mınıstrligi Taıaý Shyǵystaǵy jaǵdaıǵa baılanysty Qazaqstan azamattaryna taǵy da úndeý jasady.

Taıaý Shyǵystaǵy áskerı-saıası ahýaldyń kúrt kúrdelenýine baılanysty Qazaqstan Respýblıkasynyń Syrtqy ister mınıstrligi Qazaqstan azamattaryna Taıaý Shyǵys elderine buryn josparlanǵan barlyq sapardy qaıta qaraýdy qatań túrde usynady.

— Qazirgi ýaqytta jaǵdaı men yqtımal táýekelderge jan-jaqty baǵa berilip jatyr, quzyretti memlekettik organdarmen jáne sheteldik seriktestermen úılestirilgen jumys júrgizilýde. Taıaý Shyǵys óńiriniń birqatar elinde áýe keńistigin paıdalanýǵa ýaqytsha shekteýler engizildi, bul halyqaralyq reısterdiń toqtatylýyna jáne keıinge shegerilýine alyp keldi, — delingen habarlamada.

Osyǵan baılanysty SІM Taıaý Shyǵys elderinde, ásirese Qatar men Birikken Arab Ámirlikterinde júrgen Qazaqstan azamattaryna kelesi saqtyq sharalaryn ustanýdy usynady:

• sabyr saqtap, jergilikti bılik organdary belgilegen qaýipsizdik sharalaryn qatań oryndaý;

• adamdar kóp jınalatyn is-sharalarǵa qatysýdan jáne áskerı nysandarǵa jaqyndaýdan aýlaq bolý;

• qabyldaýshy elderdiń resmı organdary men Qazaqstan ókildikteri taratqan aqparatty muqııat baqylaý;

• brondalǵan reısterdiń statýsyn jáne elden shyǵý baǵyttaryn turaqty túrde naqtylap otyrý;

• tómende kórsetilgen jedel baılanys arnalary arqyly Qazaqstan Respýblıkasynyń elshilikterimen tikeleı baılanysta bolý.

1. Qazaqstannyń Qatardaǵy elshiligi: [phone] [phone] [e-mail] [e-mail]

2. Qazaqstannyń BAÁ-degi elshiligi (Ábý Dabı q.): [phone] [phone] [e-mail]

3. Qazaqstannyń Dýbaıdaǵy bas konsýldyǵy: [phone] [phone] [e-mail]

4. QR Syrtqy ister mınıstrligi: [phone]

— Taıaý Shyǵys elderindegi QR Syrtqy ister mınıstrliginiń barlyq dıplomatııalyq ókildikteri shtattyq rejımde jumys istep jatyr. Jaǵdaıdyń damýyn únemi baqylaýda ustap, Qazaqstan azamattaryna qajetti konsýldyq-quqyqtyq kómekti táýlik boıy kórsetýdi jalǵastyrýda, — dep túıindedi vedomstvo.

Osyǵan deıin Qazaqstan Respýblıkasynyń Qatar memleketindegi elshiligi Katardaǵy ahýal beıbit turǵyndar úshin qaýipsiz ekenin málimdedi.