SІM Taılandta qazaqstandyq reperdiń joǵalýyna qatysty jaǵdaıǵa pikir bildirdi
ASTANA. KAZINFORM — «Kıslo-Sladkıı» laqap atymen tanymal qazaqstandyq reper Darhan Jumabek Taılandta izdestirilip jatyr.
Mýzykanttyń joǵalyp ketkeni týraly buǵan deıin qazaqstandyq rejısser Parasat Ibraev habarlaǵan bolatyn. Onyń aıtýynsha, ónerpaz Taılandqa barǵannan keıin baılanysqa shyqpaı qalǵan.
Rejısserdiń málimetinshe, reper tańerteń Phýketten Bangkokqa ushýy tıis bolǵan, alaıda onymen baılanysý múmkin bolmaǵan.
— Barlyq telefony óshirýli. Keshe sońǵy ret sóılesken kezde qasynda bir jigit bolǵan. Onyń aıtýynsha, Darhan Malaızııaǵa ketip qalýy múmkin, — dedi Ibraev.
Sondaı-aq rejısser kóshi-qon polıtsııasyna júginip, mýzykanttyń syrt beınesi sıpattalǵan izdeý paraǵyn jasaǵanyn aıtty. Buǵan qosa, ol reper joǵalyp keter aldynda jibergen beınejazbany jarııalady.
Darhan Jumabektiń joǵalǵany týraly áleýmettik jeli qoldanýshylary da jazyp jatyr. Taraǵan aqparatqa sáıkes, ony sońǵy ret Pattaıa qalasynda kórgender bar.
Kazinform tilshisi jaǵdaıǵa qatysty Qazaqstan Syrtqy ister mınıstrliginen pikir surady.
— Qazaqstan Respýblıkasy Syrtqy ister mınıstrligine Taılandta Qazaqstan azamatynyń joǵalyp ketkeni týraly aqparat belgili. Bizdiń dıplomattar jergilikti quqyq qorǵaý organdarymen jáne Taılandtyń quzyretti qyzmetterimen turaqty baılanysta. Qajetti izdestirý sharalary júrgizilip jatyr. Másele mınıstrliktiń baqylaýynda, — dep habarlady vedomstvo.
Aıta keteıik, buǵan deıin Qazaqstan Syrtqy ister mınıstrligi AQSh-ta joǵalyp ketken qazaqstandyq azamattyń qaza tapqanyn rastaǵanyn jazǵanbyz.
