SІM Taıland pen Kambodja arasyndaǵy birlesken deklaratsııaǵa qatysty málimdeme jasady
ASTANA. KAZINFORM — Taıland pen Kambodja arasyndaǵy qaqtyǵysty beıbit jolmen retteý jónindegi birlesken deklaratsııanyń qol qoıylýyna oraı Qazaqstan Respýblıkasy Syrtqy ister mınıstrligi pikir bildirdi.
— Qazaqstan Respýblıkasynyń Syrtqy ister mınıstrligi 2025 jylǵy 25-28 qazanda Kýala-Lýmpýrda ótip jatqan Ońtústik Shyǵys Azııa memleketteri qaýymdastyǵynyń (ASEAN) 47-shi sammıti aıasynda AQSh Prezıdenti Donald Tramptyń jáne Malaızııanyń Premer-mınıstri Anvar Ibragımniń tikeleı qatysýymen Taıland Koroldigi men Kambodja Koroldigi arasyndaǵy qaqtyǵysty beıbit jolmen retteý jónindegi birlesken deklaratsııanyń qol qoıylýyn quptaıdy, — delingen habarlamada.
Vedomstvonyń málimdemesinde sondaı-aq Qazaqstan Ońtústik Shyǵys Azııa óńirinde beıbitshilik pen turaqtylyqty qalpyna keltirýge baǵyttalǵan taraptardyń kúsh-jigerin joǵary baǵalaıtyny aıtylǵan. Qol jetkizilgen ýaǵdalastyqtar BUU Jarǵysynyń negizgi qaǵıdattaryna, qaýipsizdik pen órkendeýdi qamtamasyz etýge beıildilikti kórsetedi, sondaı-aq kez kelgen daýlardy retteýde dıplomatııalyq sheshimderdiń balamasyzdyǵyn dáleldeıdi.
— Osy Birlesken deklaratsııanyń qol qoıylýy Taıland pen Kambodja arasyndaǵy dostyq jáne tatý kórshilik qatynastardyń odan ári nyǵaıýyna berik negiz qalaıtynyna jáne de ASEAN aıasyndaǵy óńirlik yntymaqtastyqty tereńdetýge óz úlesin qosatynyna senimdimiz, — dep jazdy mınıstrlikten.
Aıta keteıik, Taıland pen Kambodja Kýala-Lýmpýrda beıbit kelisimge qol qoıǵan bolatyn.
