SІM shetel elshilikteri men konsýldyqtaryn tirkeýdiń jańa tártibin jarııalady

ASTANA. KAZINFORM – Syrtqy ister mınıstrligi shet memleketterdiń dıplomatııalyq jáne olarǵa teńestirilgen ókildikterin, halyqaralyq uıymdardy jáne olardyń ókildikterin tirkeýdiń jańa tártibin talqylaýǵa shyǵardy. 

Usynylyp otyrǵan tártipte elshilikter men konsýldyqtar Qazaqstan aýmaǵynda jumys isteý úshin Syrtqy ister mınıstrligi arqyly tirkeletini aıtylǵan. Qoldanystaǵy tártipte bul másele naqty kórsetilmegen. Qazirgi tártip boıynsha ókildikter men konsýldyq mekemelerdi tirkeý úshin shetel memleketiniń dıplomatııalyq ókildigi erkin túrde nota jiberetin bolsa, jańa redaktsııada verbaldy nota jiberý kerektigi aıtylǵan.

— Qazaqstan aýmaǵynda konsýldyq mekeme ashý týraly verbaldy nota jiberedi. Verbaldy notada ókildik pen konsýldyq mekemeniń ornalasqan mekenjaıy kórsetiledi, - dep jazylǵan qujat jobasynda.

Jańa tártip boıynsha ókildikter men konsýldyq mekemelerdi tirkeý týraly anyqtama berilgen kúnnen bastap úsh jyl merzimge jaramdy bolmaq. Mınıstrlik ókildikter men elshilikterdi tirkeýmen qatar Qazaqstan aýmaǵyna kelgen jáne turatyn qyzmetkerler men olardyń otbasy múshelerin akkredıtteıdi.

Qyzmetkerlerdiń otbasy múshelerine:

1) jubaıy;

2) nekede turmaıtyn balalary: 18 jasqa tolmaǵan; 21 jasqa tolmaǵan jáne Qazaqstannyń joǵary jáne orta arnaýly oqý oryndarynda oqıtyn; 25 jasqa tolmaǵan, baǵyp-qaǵýdaǵy ata-analary men balalary jatady.

Sondaı-aq qujat jobasynda akkredıtteý kýálikteriniń sanat boıynsha artyqshylyqtary naqtylanǵan. 

«D» serııaly akkredıtteý kýálikteri shetel memleketiniń dıplomatııalyq mártebesin rastaıtyn sheteldik pasporty bolǵan jaǵdaıda myna tulǵalarǵa resimdeledi: 

1) ókildikterdiń basshylaryna;

2) ókildikterdiń dıplomatııalyq personalyna;

3) áskerı, teńiz jáne áýe attashelerine;

4) Birikken Ulttar Uıymy júıesiniń R4, R5, D1, D2 laýazymdyq sanattaryna jatatyn qyzmetkerlerine, halyqaralyq uıymdar men olardyń ókildikteriniń qyzmetkerlerine;

5) osy tarmaqtyń ekinshi bóliginiń 1), 2), 3) jáne 4) tarmaqshalarynda kórsetilgen tulǵalardyń otbasy múshelerine.

«C» serııaly akkredıtteý kýálikteri sheteldik memlekettiń dıplomatııalyq pasporty bolǵan jaǵdaıda myna tulǵalarǵa resimdeledi:

1) konsýldyq laýazymdy tulǵalarǵa;

2) konsýldyq laýazymdy tulǵalardyń otbasy múshelerine.

«T» serııaly akkredıtteý kýálikteri qyzmettik pasport bolǵan jaǵdaıda myna tulǵalarǵa resimdeledi:

1) ókildikterdiń ákimshilik-tehnıkalyq personalynyń múshelerine;

2) konsýldyq mekemelerdiń konsýldyq qyzmetkerlerine;

3) osy tarmaqtyń 1) jáne 2) tarmaqshalarynda kórsetilgen tulǵalardyń otbasy múshelerine.

«S» serııaly akkredıtteý kýálikteri sheteldik pasport bolǵan jaǵdaıda, jiberýshi nemese ókildik etýshi memleketpen ózara kelisim prıntsıpi negizinde myna tulǵalarǵa resimdeledi:

1) ókildikterdiń qyzmet kórsetý personalynyń múshelerine;

2) konsýldyq mekemelerdiń qyzmet kórsetý personalynyń qyzmetkerlerine;

3) osy tarmaqtyń 2) tarmaqshasynda kórsetilgen tulǵalardyń otbasy múshelerine;

4) ókildikterdiń úı qyzmetkerlerine;

5) konsýldyq mekemelerdiń jeke úı qyzmetkerlerine.

«M» serııaly akkredıtteý kýálikteri halyqaralyq uıymdar men (nemese) olardyń ókildikteriniń qyzmetkerlerine jáne olardyń otbasy múshelerine, eger olar osy tarmaqtyń ekinshi, úshinshi, tórtinshi, besinshi jáne jetinshi bólikterinde kórsetilgen tulǵalar sanattaryna jatpasa, resimdeledi.

«HC» serııaly akkredıtteý kýálikteri ókildik etýshi memleketpen ózara kelisim prıntsıpi negizinde qurmetti konsýldyq laýazymdy tulǵalarǵa resimdeledi. Bul rette, qurmetti konsýldyq laýazymdy tulǵalardyń otbasy múshelerine kýálikter resimdelmeıdi.

Buǵan deıin hakerlik shabýylǵa ushyraǵan Syrtqy ister mınıstrliginiń júıesi tekserilip jatqany týraly málimet bolǵan edi.