SІM Reseımen qaqtyǵys aımaǵyndaǵy qazaqstandyqtardy elge qaıtarý boıynsha kelissóz júrgizip jatyr
ASTANA. KAZINFORM — Qazaqstannyń Syrtqy ister mınıstrligi qaqtyǵys júrip jatqan aımaqta júrgen qazaqstandyqtardy elge qaıtarý máselesi boıynsha jumysyn jalǵastyryp jatyr, dep habarlaıdy Kazinform agenttiginiń tilshisi.
Mınıstrliktiń jedel jelisine azamattardan ótinishter áli de túsip jatyr. Olardyń árqaısysy boıynsha aqparat tekseriledi.
— Tekserý aıaqtalǵannan keıin jasaqtalǵan tizim Reseı tarapyna joldanady, — dep habarlady QR SІM.
Vedomstvo áleýmettik jelilerde beıneúndeý jarııalaǵan Qazaqstan azamattaryna qatysty qajetti sharalar qabyldanyp jatqanyn da atap ótti.
— Olardy elge qaıtarý boıynsha kelissózder júrgizilip jatyr, — delingen mınıstrlik habarlamasynda.
QR SІM bul másele boıynsha Reseı tarapymen túrli deńgeıde turaqty baılanys ornatyp otyr.
Buǵan deıin SІM qaqtyǵys aımaǵynda júrgen qazaqstandyqtar týraly málimetti olardyń týystarynan habarlaýdy suraǵan bolatyn. Ótinishterdi qabyldaý úshin mınıstrlikte arnaıy jedel jeli jumys isteıdi.
