SІM Reseı shekarasyndaǵy jańa talaptarǵa qatysty pikir bildirdi

ASTANA. KAZINFORM – Syrtqy ister mınıstrliginiń resmı ókili Aıbek Smadııarov Reseı tarapynan 30 maýsymnan bastap engiziletin shekaralyq baqylaýdyń jańa talaptaryna qatysty pikir bildirdi, dep habarlaıdy Kazinform agenttigi.

— Barlyq málimet Reseıdegi elshiligimizdiń saıtynda jarııalanǵan, sondaı-aq bul birneshe ret buqaralyq aqparat quraldarynda da jaryq kórdi. Sondyqtan Reseıge baratyn QR azamattary shekarada eshqandaı túsinispeýshilik bolmas úshin shekaradan ótýge qatysty jańa talaptarmen aldyn ala tanysyp shyǵýy qajet, — dedi Aıbek Smadııarov BAQ ókilderine arnalǵan brıfıng barysynda.

BAQ ókilderi Qazaqstan tarapynan buǵan qarsy qandaı shara qabyldanatynyn surady.

— Bul máseleni biz muqııat zerttep jatyrmyz, ol úshin memlekettik organdarmen keńesý qajet. Keıinirek naqty aqparat bere alamyn. Sondaı-aq, Reseımen aradaǵy vızasyz rejımniń saqtalatynyn atap ótkim keledi. Bul tek shekaradan ótýge qoıylatyn talaptar ǵana, — dedi Aıbek Smadııarov.

Buǵan deıin habarlanǵandaı, 30 maýsymnan bastap Reseıge kirý úshin keminde 72 saǵat buryn RuID platformasy arqyly elektrondy ótinish berý jáne biregeı QR-kod alý qajet bolady. Shekaradan ótý kezinde saýsaq izderin tapsyryp, sýretke túsip, bıometrııalyq sáıkestendirýden ótý de talap etiledi.