SІM Nepal men Tıbette joǵalǵan qazaqstandyqtardy izdeý barysy týraly jańa málimet berdi
ASTANA. KAZINFORM — Syrtqy ister mınıstrligi Nepal men QHR Tıbet avtonomııalyq aýdanyndaǵy tabıǵı apat aımaǵynda qalǵan Qazaqstan azamattarynyń jaǵdaıyn baqylaýda ustap otyr.
Nepal tarapynyń málimetinshe, Nepal aýmaǵyndaǵy izdeý-qutqarý operatsııasy 5 qazanda resmı túrde aıaqtaldy.
— Qazirgi ýaqytta zardap shekken aýdandarda qalpyna keltirý jumystary júrgizilip jatyr, osy jumystar barysynda tabylǵan máıitter men jeke zattardyń tıistiligi anyqtalyp jatyr. QHR Tıbet avtonomııalyq aýdanynda eń kóp zardap shekken Gırong ýezinde izdeý jumystary jalǵasyp jatyr. Qytaı tarapy sonymen qatar máıitterdi anyqtaý jáne genetıkalyq saraptama boıynsha jumystar júrgizilip jatyr, — delingen habarlamada.
Buǵan deıin Qazaqstannan kelgen úsh týrıst habar-osharsyz ketken dep eseptelgen bolatyn. Ekeýi Nepalda, bireýi Qytaıda delingen. Nepalda bolýy múmkin dep sanalǵan jáne habarsyz ketkender tiziminde turǵan olardyń bireýimen baılanys ornatyldy. Onyń tabıǵı apat aımaǵyna sapardan bas tartqany anyqtaldy. Qazirgi ýaqytta ol Qazaqstanda.
— Qalǵan eki otandasymyzdyń turǵan jeri ázirge anyqtalǵan joq. Olardyń týystary anyqtaýǵa qajetti rásimderden ótti, onyń ishinde Nepal men QHR-dyń quzyretti organdary belgilegen tártipke sáıkes, DNQ-ny taldaý úshin bıologııalyq materıal tapsyrdy, — delingen SІM habarlamasynda.
Qazaqstandyq dıplomattar habarsyz ketkenderdiń otbasylarymen baılanysta bola otyryp, olarǵa qajet qoldaýdy kórsetýde.
