SІM qazaqstandyqtarǵa Taıaý Shyǵys elderine sapardy keıinge qaldyrýǵa keńes berdi
ASTANA. KAZINFORM — QR Syrtqy ister mınıstrligi qazaqstandyqtardy jazǵy demalys maýsymynda shetelge saparlardy josparlaý kezinde halyqaralyq jaǵdaıdy eskerýge shaqyrdy. Bul týraly vedomstvonyń resmı ókili Erlan Jetibaev brıfıng barysynda málimdedi.
— Azamattardy shetelge saparlaryn josparlaýǵa barynsha muqııat qaraýǵa jáne baratyn eldegi ahýaldy mindetti túrde eskerýge shaqyramyz, — dedi ol.
Onyń aıtýynsha, bul ásirese qazaqstandyq týrıster jıi baratyn baǵyttarǵa — Birikken Arab Ámirlikterine, Katarǵa, Saýd Arabııasyna jáne Taıaý Shyǵystyń ózge de elderine qatysty.
— Biz óńirde beıbitshilik pen qaýipsizdikti qamtamasyz etýge yqpal etetin ózara qolaıly sheshimderge jaqyn arada qol jetkiziledi dep úmittenemiz. Sonymen qatar jaǵdaı tolyq turaqtalǵanǵa deıin saqtyq tanytqan jón dep sanaımyz. Osyǵan baılanysty azamattarǵa múmkindiginshe óńir elderine asa qajet emes saparlardan ýaqytsha bas tartýdy usynamyz, — dedi Erlan Jetibaev.
Syrtqy ister mınıstrligi shet memleketterge kirý tártibine qatysty ózekti aqparatty vedomstvonyń resmı saıtynda turaqty túrde jarııalap otyratynyn eske saldy.
Erlan Jetibaevtyń aıtýynsha, sońǵy ýaqytta sheteldik týrısterge qoıylatyn talaptardy ózgertken elderdiń qatarynda Reseı, Vetnam jáne Shengen aımaǵyna kiretin memleketter bar.
Aıta keteıik, SІM qaýip-qater joǵary aımaqtardy ataǵan edi.
