SІM qazaqstandyqtardy eskalatsııa aımaqtarynan shyǵarý baǵyttaryn pysyqtap jatyr
ASTANA. KAZINFORM — Taıaý Shyǵys elderindegi áskerı-saıası jaǵdaıdyń shıelenisýi jaǵdaıynda Qazaqstan Respýblıkasy Syrtqy ister mınıstrligi quzyretti memlekettik organdarmen jáne shet memleketterdiń bılik qurylymdarymen táýlik boıy ózara is-qımyldy qamtamasyz etýde.
Qazaqstannyń sheteldegi mekemeleri kúsheıtilgen jumys rejımine kóshirildi jáne otandastarǵa qajetti konsýldyq-quqyqtyq kómek kórsetilýde. Óńir elderinde sondaı-aq tranzıttik aımaqtarda júrgen azamattardyń tizimderi ózektendirilýde. Messendjerlerde jedel chattar qurylyp, otandastardyń qyzyǵýshylyǵyn týdyratyn suraqtarǵa jaýaptar jáne eldegi jaǵdaı týraly aqparat jáne tıisti usynystar berilip jatyr.
QR SІM-de jáne sheteldegi mekemelerinde shuǵyl baılanys jelileri ashyldy. Qaqtyǵys aımaǵynda júrgen azamattarymyzdyń sany týraly aqparat qurý jalǵasýda. Bul rette tranzıttik aımaqtarda júrgen azamattardyń naqty sanyn ataý qıyn ekenin atap ótken jón.
QR dıplomatııalyq ókildikteriniń qyzmetkerleri týrıstik kompanııalarmen birlese, áýejaılar men tranzıttik aımaqtarda júrgen azamattardy ornalastyrý máselelerinde qoldaý kórsetýde.
QR azamattaryn qaqtyǵys aımaǵynan shyǵarý boıynsha sharalar men baǵyttar pysyqtalýda. Qosymsha túsindirmeler Mınıstrlik pen sheteldegi mekemelerdiń resmı resýrstary arqyly, sondaı-aq Kaspi Travel qosymshasy arqyly jiberiletin habarlamalar arqyly jetkiziletin bolady.
— Azamattardy sabyr saqtaýǵa, jergilikti bılik organdarynyń talaptary men usynymdaryn saqtaýǵa, qaterli aımaqtardan aýlaq bolýǵa, sondaı-aq engizilgen shekteýlerge túsinistikpen qaraýǵa shaqyramyz, — delingen habarlamada.
Qazirgi ýaqytta Qazaqstan Respýblıkasynyń azamattary arasynda zardap shekkender týraly aqparat túsken joq.
— Qosymsha aqparat túsken jaǵdaıda tıisti málimet jedel túrde jarııalanatyn bolady. Osyǵan baılanysty QR SІM men sheteldegi mekemeleriniń resmı resýrstaryndaǵy habarlamalardy muqııat qadaǵalaýdy suraımyz, — delingen SІM habarlamasynda.
Aıta ketelik QR Irandaǵy elshiligi shuǵyl baılanys tártibi men elden ketý múmkindikterin túsindirgen edi.