SІM Qazaqstan men Qytaı úkimeti arasyndaǵy aqparat almasý kelisimine túsinik berdi
Syrtqy ister mınıstrliginiń resmı ókili Aıbek Smadııarov Qazaqstan men Qytaı Úkimetteri arasyndaǵy aqparat almasý kelisimine túsinik berdi, dep habarlaıdy QazAqparat tilshisi.
«Qytaıdaǵy qazaqtardyń máselesimen aınalysatyn quqyq qorǵaý uıymdary Almatyda birneshe ret jıyn ótkizip, alańdaýshylyq bildirip jatyr. Qazaqstan men Qytaı Úkimetteri rásimdegen qujat arqyly (Qazaqstan Úkimeti men Qytaı Úkimeti arasyndaǵy taraptar memleketteriniń azamattaryna qatysty aqparat almasý týraly kelisimdi ratıfıkatsııalaý týraly zań) erteń Qazaqstan azamattyǵyn suraǵan ulty qazaqtardyń pasportyna veto jarııalaýy múmkin degen qaýip bar. Osyǵan negiz bar ma?» dep surady BAQ ókilderi atalǵan vedomstvoda ótken brıfıngte.
SІM resmı ókiliniń aıtýynsha, atalǵan kelisimniń basty oryndaýshysy — Іshki ister mınıstrligi.
«Sondyqtan men tolyq túsinikteme bildire almaımyn. Óıtkeni, bul qujattyń mán-jaıyq anyq bilmeımin. Ózderińiz bilesizder, karantınnen keıin myńdaǵan qandasymyz elge keldi. Ol — qytaı tarapymen tyǵyz jumys istegenimizdiń nátıjesi. Sondyqtan odan qorqýdyń qajeti joq. Tek qana zańsyz qujatpen júrgen, qos azamattyǵy bar adamdardy anyqtaý úshin jasalyp jatyr», — dedi resmı ókil.
Ol Qytaıdyń azamattyǵynan shyqpaı sol elden zeınetaqy alyp júrgen, biraq Qazaqstanda turatyn azamattarǵa shekteý qoıylatynyn aıtady.
«Bári dep aıta almaımyn. Biraq arasynda bar. Qytaı azamattyǵynan shyqpaı sol jaqtan zeınetaqysyn alyp júredi. Bul jaqqa kelip qujattaryn rásimdeıdi. Solaı eki eldiń arasynda júretinder bar. Eki elden birdeı tólem alý zańsyz. Zańdy buzǵannan keıin mindetti túrde shara qoldanylady», — dedi Aıbek Smadııarov.
Aıta keteıik, taıaýda Májilistiń jalpy otyrysynda Qazaqstan Úkimeti men Qytaı Úkimeti arasyndaǵy taraptar memleketteriniń azamattaryna qatysty aqparat almasý týraly kelisimdi ratıfıkatsııalaý týraly zań qabyldanǵan edi.
