SІM: Iranda – 132, Izraılde – 219 Qazaqstan azamaty bar

ASTANA.KAZINFORM – Qazaqstan Syrtqy ister mınıstrligi Taıaý Shyǵystaǵy jaǵdaıdy erekshe baqylaýda ustap otyr. Bul týraly SІM resmı ókili Aıbek Smadııarov málimdedi. 

– Atalǵan óńirdegi Qazaqstannyń dıplomatııalyq ókildikteri kúsheıtilgen rejımde jumys istep jatyr. Qolda bar málimet boıynsha, qazirgi ýaqytta Iranda 132, al Izraılde 219 Qazaqstan azamaty bar. Dıplomattar otandastarymyzben turaqty baılanysta, – dedi Aıbek Smadııarov.

Onyń aıtýynsha, qazirgi kúrdeli jaǵdaıda atalǵan elderde júrgen azamattarǵa asa qajettilik bolmasa, turǵan jerinen shyqpaýǵa keńes beriledi.

– Qaýipsizdik sharalaryn qatań saqtaýǵa, qyraǵylyq pen saqtyq tanytýǵa, resmı aqparat kózderinen jańalyqtardy qadaǵalaýǵa jáne jergilikti bılik organdarynyń nusqaýlaryn buljytpaı oryndaýǵa shaqyramyz, – dep eskertti SІM resmı ókili.

Buǵan deıin, Dýbaıdan qazaqstandyq týrısterdi jetkizgen eki ushaq Almatyǵa qonǵanyn habarlaǵanbyz.