SІM Indonezııada ólim jazasyna kesilýi múmkin eki qazaqstandyqqa qatysty pikir bildirdi
ASTANA. KAZINFORM - Indonezııanyń Balı aralynda esirtkige baılanysty qylmys jasady degen kúdikpen ustalǵan eki Qazaqstan azamatyna ólim jazasy taǵaıyndalýy múmkin.
Indonezııada esirtki tasymaldaý men saýdasyna qatysty qatań jaza qarastyrylǵan. Buǵan deıin bul elde shetel azamattaryna qatysty ólim jazasy birneshe ret oryndalǵan, alaıda 2017 jyldan beri atalǵan jazaǵa moratorıı engizilgen.
Indonezııa BAQ-ynyń málimetinshe, Qazaqstannyń eki azamaty sáýir aıynda ustalǵan. Olardyń janynan shamamen 49 gramm metamfetamın tárkilengen, bul úshin olar ólim jazasyna kesilýi múmkin.
Qazaqstan Respýblıkasy Syrtqy ister mınıstrligi bul jaǵdaıǵa qatysty resmı túsinikteme berdi:
— Qazirgi ýaqytta atalǵan azamattarǵa qatysty Indonezııanyń quzyrly organdary sotqa deıingi tergep-tekserý jumystaryn júrgizip jatyr, sondyqtan ózge aqparat jarııa etýge jatpaıdy. Qazaqstannyń Djakartadaǵy Elshiligi tergeý organdarymen jáne kúdiktilerdiń týystarymen baılanysta jumys isteýde. Bul másele qazaqstandyq dıplomattardyń erekshe baqylaýynda, — delingen SІM málimdemesinde.
Aıta keteıik, Iranda 2023 jyly Ázerbaıjan elshiligine shabýyl jasaǵan adam ólim jazasyna kesildi.