SІM fýtboldan Álem chempıonatyna baratyn qazaqstandyqtarǵa eskertý jasady
ASTANA. KAZINFORM — QR SІM fýtboldan Álem chempıonatynyń matchtaryna baratyn qazaqstandyqtarǵa týrnırdi qabyldaıtyn elderdiń kóshi-qon zańdary men vızalyq talaptaryn saqtaýdy eskertti.
Belgili bolǵandaı, 2026 jylǵy 11 maýsym men 19 shilde aralyǵynda AQSh-ta, Kanadada jáne Meksıkada fýtboldan álem chempıonaty ótedi.
Bul sharaǵa kóptegen sheteldik jankúıerler, onyń ishinde Qazaqstan azamattary da qatysady.
Osyǵan baılanysty QR Syrtqy ister mınıstrligi chempıonat matchtaryna jáne ózge de is-sharalarǵa barýdy josparlaǵan azamattarǵa jeke qaýipsizdik máselelerine erekshe nazar aýdaryp, kúsheıtilgen saqtyq sharalaryn saqtaýdy usynady.
— Ózderińizben birge jeke basyn kýálandyratyn qujattardy nemese olardyń kóshirmelerin únemi alyp júrý, jergilikti quqyq qorǵaý organdary men is-shara uıymdastyrýshylarynyń talaptaryn qatań saqtaý, qozǵalys baǵyttaryn aldyn ala josparlaý jáne tek resmı kólik qyzmetterin paıdalaný usynylady, — dedi QR SІM resmı ókili Erlan Jetibaev Astanada ótken aptalyq brıfıngte.
Sondaı-aq beıresmı jappaı jıyndar men chempıonattyń resmı aımaqtarynan tys adamdar kóp shoǵyrlanatyn oryndardan aýlaq bolýǵa, jeke zattar men qujattardy qaraýsyz qaldyrmaýǵa, qoǵamdyq oryndarda saq bolýǵa jáne jergilikti bılik, týrnır uıymdastyrýshylary men tótenshe qyzmetterdiń habarlamalaryn muqııat qadaǵalaýǵa keńes berildi.
— Tıisti elderde bolý jáne tranzıttik ótý erejelerin, vızalyq talaptardy qatań saqtaý máselesine erekshe kóńil bólinýi qajet. Tótenshe jaǵdaı týyndasa, dereý jergilikti jedel qyzmetterge habarlasyp, Qazaqstan Respýblıkasynyń dıplomatııalyq jáne konsýldyq mekemelerimen baılanysta bolý qajet, — dedi resmı ókil.
Syrtqy ister mınıstrligi men sheteldegi mekemeler jaǵdaıdy turaqty túrde baqylaýda ustap, óz quzyreti sheginde azamattarǵa qajetti konsýldyq kómek kórsetýdi jalǵastyrady.
Eske sala ketsek, Chempıondar lıgasy fınalynda Parı Sen-Jermen klýby Londonnyń Arsenal FC komandasyn jeńgennen keıin Frantsııanyń birneshe qalasynda tártipsizdik boldy. Fýtbol jankúıerleri men polıtsııa arasyndaǵy qaqtyǵystar saldarynan 400-den astam adam ustaldy.
