SІM: Dmıtrıı Harrıstiń naqty azamattyǵyn anyqtaý qajet
ASTANA. KAZINFORM — Qazaqstannyń Syrtqy ister mınıstrligi ózin Reseı aýmaǵynda ustap otyrǵanyn málimdegen Dmıtrıı Harrıstiń azamattyǵyna qatysty aqparatty tekserip jatyr. Bul týraly Senattaǵy brıfıngte QR Syrtqy ister mınıstriniń birinshi orynbasary Erjan Ashyqbaev málimdedi.
E. Ashyqbaev bul máselege baılanysty Reseı tarapymen kelissózder júrip jatyr ma degen tilshiler suraǵyna jaýap berdi jáne mınıstrlik azamattyń ótinishin alǵanyn jáne tıisti organdarmen baılanysta ekenin aıtty.
— Dmıtrıı Harrıs jaǵdaıy týraly máseleden habarym bar. Biz azamat Harrısovtyń ótinishin alǵanymyzdy rastaımyz. Reseı Federatsııasynyń quzyrly organdarynyń málimetinshe, atalǵan azamat Reseı Federatsııasynyń da azamaty retinde tirkelgen, — dedi Erjan Ashyqbaev.
Onyń aıtýynsha, kelesi qadamdardy jasaý úshin ótinish berýshiniń naqty qaı eldiń azamaty ekeni anyqtalýy qajet.
— Eń aldymen onyń naqty qaı eldiń azamaty ekenin naqtylaý qajet. Osy maqsatta bizdiń Astrahandaǵy bas konsýldyǵymyz onyń ózimen jáne Reseıdiń quzyrly organdarymen tikeleı baılanys ornatty, — dedi SІM basshysynyń birinshi orynbasary.
Sondaı-aq ol qazaqstandyq dıplomattar azamatqa qajetti konsýldyq kómek kórsetip jatqanyn aıtty.
— Barlyq qajetti konsýldyq qoldaý kórsetilip jatyr jáne aldaǵy ýaqytta da jalǵasady, — dedi Erjan Ashyqbaev.
Aıta keteıik, buǵan deıin Dmıtrıı Harrıs ózin Reseı aýmaǵynda ustap otyrǵanyn aıtyp, Qazaqstannyń memlekettik organdarynan kómek suraǵan edi.
