«Slovo patsana. Krov na asfalte» fılmi jastarǵa keri áser etýi múmkin - polıtsııa

Almaty oblysy Qarasaı aýdanynyń polıtsııa basqarmasy reseılik «Slovo patsana. Krov na asfalte» serıalynyń jastarǵa keri áser etýi múmkin ekenin málimdedi, dep habarlaıdy Kazinform.

Polıtsııanyń málimetinshe, 9 qarashadan bastap reseılik jańa serıal kórsetile bastady.

«Serıal jasóspirimder men mektep ortasynda qylmystyq romantıkany nasıhattaıdy, zorlyq — zombylyq, ishimdik ishý, dórekilik pen zań buzýshylyqtyń kóptegen kórinisterin qamtıdy, sıýjet boıynsha basty nazarda — mektep oqýshylary. Shamasy, fılmniń basty maqsatty aýdıtorııasy jasóspirimder bolyp tabylady. Bul rette „18+“ belgisiniń mańyzy da bola qoımas, ol arqyly balalar kerisinshe serıaldy kórip qalǵysy keletin bolady», — delinedi polıtsııa taratqan habarlamada.

Qarasaı aýdandyq polıtsııa basqarmasy ata-analar men mektep muǵalimderin atalǵan serıaldy kórgen soń, balalardyń nazaryn baqylaýda ustaýǵa shaqyrdy. Sondaı-aq, serıalda bandıtterdiń ómiri jaman aıaqtalýyna baılanysty onda joǵary moral bar ekenin habarlady.

«Jastar arasynda qylmystyń ósýine jol bermeý kerek. Kóp jasóspirimder kınonyń áserinen ondaǵy keıipkerlerge uqsaǵysy keledi, nátıjesinde jasóspirimderdiń taǵdyry buzylyp jatady. Biz túrmelerdiń janynda sómke ustaǵan analardy kórmeý úshin birlese otyryp, jasóspirimderdiń ómirin buzýǵa jol bermeýimiz kerek. Álemge basqasha qaraý kerek. Sebebi, tóbeles, alkogol, toptasý — ol jaqsylyq emes. Bul jerde eshqandaı romantıka, sulýlyq, batyrlyq joq. Onda tek qan, ter, azap pen qarǵys bar. Biz jastar úshin jaýaptymyz. Eger búgin biz áreketsiz otyrsaq, erteń adasqan urpaq shyǵady. Al eldiń bolashaǵy siz ben bizdiń qandaı jas urpaqty tárbıelep otyrýymyzben tikeleı baılanysty», — dep málimdedi Qarasaı aýdanynyń polıtsııa basqarmasy.

Eske salaıyq, Almaty oblysynda mektep oqýshylary jappaı tóbeles shyǵarǵan bolatyn.