Slovenııadaǵy forýmda Elbasynyń bitimgershilik róli týraly aıtyldy
BLED-ASTANA. QazAqparat - Qazaqstan Prezıdenti Nursultan Nazarbaevtyń jáne eldiń bedeli - memlekettiń halyqaralyq medıatsııadaǵy jetistiginiń kepili. Bul rette osyndaı kúsh-jigerdegi ortasha deńgeıdegi memleketterdiń róli bolashaqta obektıvti túrde ósetin bolady.
Qazaqstan Syrtqy ister mınıstriniń orynbasary Roman Vasılenko 10-11 qyrkúıekte Slovenııada ótip jatqan «Bridging the Divide» (alshaqtyqty jeńý) taqyryby boıynsha jyl saıynǵy Bled strategııalyq forýmynda osylaı málimdedi, dep habarlaıdy syrtqy saıasat vedomostvosynyń baspasóz qyzmeti.
R. Vasılenko «Álemdegi jańa kóppolıarly medıatsııa - úmit pen shyndyq arasynda» paneldik sessııasyndaǵy sózinde forýmǵa qatysýshylardy kópjaqty dıplomatııany damytýǵa jáne yntymaqtastyqqa, sondaı-aq janjaldardy beıbit jáne aldyn ala retteýge baǵyttalǵan Qazaqstannyń syrtqy saıasatynyń basymdyqtary týraly habardar etti.
Osyǵan baılanysty Qazaqstan táýelsizdik alǵan sátten bastap halyqaralyq qaýipsizdikti nyǵaıtýǵa, sonymen qatar shıelenisti jaǵdaılardy saıası jáne dıplomatııalyq tásilder arqyly beıbit jolmen sheshýge eleýli úles qosyp otyrǵanyn atap ótti.
Qazaqstan dıplomaty Astananyń shıelenis aımaqtaryndaǵy máselelerdi halyqaralyq quqyqtyń normalaryna sáıkes yqpaldy halyqaralyq tetikterdi qabyldaý arqyly beıbit joldarmen sheshýdi qoldaıtynyn basa aıtty. Qazaqstandy álemniń óńirlik medıator retinde joǵary deńgeıde moıyndaýy bizdiń elimizdiń Eýropadaǵy qaýipsizdik jáne yntymaqtastyq uıymyna (EQYU) jáne Islam yntymaqtastyǵy uıymyna (IYU) tóraǵalyq etýi, sondaı-aq Prezıdent Nursultan Nazarbaevtyń Azııadaǵy ózara yqpaldastyq jáne senim sharalary jónindegi keńesti (AÓSShK) shaqyrý týraly bastamasyn álemdik qoǵamdastyqtyń qoldaýy boldy.
«Prezıdentimizdiń bitimgershilik negizinde onyń jeke kózqarasy men ustanymdary arqaý bolady. Onyń kúsh-jigeriniń arqasynda ártúrli elder arasyndaǵy qarym-qatynastardaǵy shıelenister azaıýda», - dedi R.Vasılenko.
Prezıdent N. Nazarbaevtyń jeke medıatsııalyq jigeriniń arqasynda 2016 jyly Reseı men Túrkııa kóshbasshylary arasyndaǵy qarym-qatynas qalpyna keltirildi jáne 2017 jyldyń basynan bastap Sırııa boıynsha Astana protsesi iske qosyldy.
Osy rette, Astana kelissózderi jıynǵa qatysýshylardyń úlken qyzyǵýshylyǵyn týdyrdy. Qazaqstan dıplomaty qazirgi kezge deıin uıymdastyrylǵan kelissózderdiń on kezeńiniń basty jetistigi - jaýyngerlik áreketterdi toqtatý tártibin úsh jaqty baqylaý tetigin ornatý, Sırııadaǵy shıelenisti álsiretý aımaqtaryn qurý, sondaı-aq ustalǵandarmen almasý, qaza tapqandardy tapsyrý jáne habarsyz ketken adamdardy izdeý boıynsha jumys toptarynyń qurý ekendigin atap ótti.
Otyrysqa qatysýshylar óńiraralyq ózara is-qımylǵa jáne usynylǵan formattaǵy belsendi dıalogty jalǵastyrýǵa, Qazaqstanmen yntymaqtastyqty arttyrýǵa úlken qyzyǵýshylyq tanytty. Iran ıadrolyq baǵdarlamasy boıynsha kóp jyldyq kelissózderge tikeleı qatysqan Eýropa syrtqy is-áreketter qyzmetiniń (ESVD) Bas hatshysy Helga Shmıd paneldegi óz sózinde «alty qosý bir» formatynda halyqaralyq toptyń kelissózderdi júrgizýdegi, sondaı-aq Birlesken keshendi is-qımyl josparyn (BKQJ) ımplementatsııalaýdaǵy Qazaqstannyń syndarly rólin atap ótti. Bul rette, turaqty áleýmettik-ekonomıkalyq damýdy qamtamasyz etýdi qosa alǵanda, óńirlik kún tártibindegi ózekti máselelerdi sheshýde Eýropa odaǵynyń Qazaqstanmen jáne óńirmen odan ári syndarly yntymaqtastyǵynyń áleýeti týraly atap ótildi.
Forým aıasynda R. Vasılenko men H. Shmıd arasynda jáne birqatar Eýropa jáne Azııa elderindegi áriptesterimen ekijaqty kezdesýleri ótti. Eýropa syrtqy baılanystar qyzmeti basshysymen QR men EO arasyndaǵy Keńeıtilgen áriptestik pen yntymaqtastyq týraly kelisim sheńberinde jan-jaqty yntymaqtastyqty odan ári nyǵaıtý máseleleri, onyń ishinde Qazaqstan men EO arasyndaǵy vızalyq rejimdi jeńildetý perspektıvalary, sondaı-aq Ortalyq Azııa elderimen qarym-qatynas boıynsha EO jańa strategııasyn ázirleý barysy talqylandy.
Aıta ketken jón, Bled strategııalyq forýmy (BSF) 2006 jyly Ońtústik-Shyǵys jáne Ortalyq Eýropa boıynsha saıasat, qaýipsizdik jáne ekonomıkalyq damý salasyndaǵy qazirgi zamanǵy máselelerdi talqylaý úshin túrli salalardaǵy basshylardy tartý, sondaı-aq olardy sheshýdiń jańa joldaryn tabý maqsatynda 2006 jyly quryldy. Osy jyly Slovenııa úkimeti uıymdastyrǵan basty syrtqy saıası halyqaralyq is-sharaǵa 70 elden 1200-den astam qonaq qatysty, onyń ishinde memleketter men halyqaralyq uıymdardyń joǵary laýazymdy tulǵalary, syrtqy ister mınıstrleri, saıasatkerler, sarapshylar, BAQ ókilderi jáne basqalar.
BSF-ti uıymdastyrýshylar - Slovenııa Respýblıkasynyń Úkimeti, Syrtqy ister mınıstrligi jáne Eýropa perspektıvalar ortalyǵy. Uıymdastyrýshylardyń aıtýynsha, Bled strategııalyq forýmy ádil jáne demokratııalyq álemdik tártipti qalyptastyrý úshin ıdeıalarmen bólisý alańdarynyń biri bolyp tabylady.
