Slovenııada is basyndaǵy premer-mınıstrdiń partııasy jalpy saılaýda jeńiske jetti

ASTANA.KAZINFORM - Slovenııanyń qazirgi premer-mınıstri Robert Golob jetekshilik etetin «Erkindik qozǵalysy» partııasy jalpy saılaýda az ǵana basymdyqpen jeńiske jetti, dep habarlaıdy Anadolu.

Memlekettik saılaý komıssııasynyń aldyn ala derekterine sáıkes, bıýlletenderdiń 99,85%-y sanalǵannan keıin «Erkindik qozǵalysy» 28,62% daýys jınaǵan. Burynǵy premer-mınıstr ıAnez ıAnsha basqaratyn Slovenııa demokratııalyq partııasy (SDS) 27,95% daýysqa ıe boldy.

Az ǵana aıyrmashylyqpen jeńiske jetken Golob partııasy 90 oryndyq parlamentten 29 mandat alady, al SDS — 28 orynǵa ıe bolady.

Eldegi saılaý júıesine sáıkes, parlamentke ótý úshin partııalar jalpyulttyq deńgeıde keminde 4% daýys jınaýy tıis. Bul mejeden «Erkindik qozǵalysy» men SDS-ten bólek taǵy bes partııa ótti.

Nátıjeler jarııalanǵannan keıin jaqtastary aldynda sóz sóılegen Robert Golob ekinshi merzimge jetý ońaı bolmaǵanyn aıtty.

Onyń sózinshe, Slovenııada qoǵamnyń talap-tilegi joǵary, bılik aıtylǵan syn-pikirlerdi biledi. Soǵan qaramastan, úkimet óz saıası baǵytyn ózgertpeıdi.

Óz kezeginde ıAnez ıAnsha daýys sanaý kezinde zańbuzýshylyqtar anyqtalǵanyn aıtyp, tıisti shaǵym túsiretinin málimdedi. Sondaı-aq ol merziminen buryn saılaý ótkizýdiń el úshin paıdaly bolatynyn jetkizdi.

Qorytyndy nátıjeler resmı bekitilgennen keıin Golob jetekshilik etetin «Erkindik qozǵalysy» partııasy úkimet qurý úshin ózge saıası kúshtermen koalıtsııalyq kelissózder bastaıdy dep kútiledi.

Slovenııadaǵy parlament saılaýy proportsıonaldy ókildik júıesi boıynsha ótedi. El 8 saılaý okrýgine bólingen, olardan 88 depýtat saılanady. Taǵy eki mandat ıtalııalyq jáne vengr azshylyqtaryna tıesili. Osylaısha, ulttyq jınalysta barlyǵy 90 oryn bar.

Aldyńǵy jalpy saılaý elde 2022 jyly ótken.

Buǵan deıin Eýropalyq odaqqa múshe Danııa 24 naýryzda jalpy saılaý ótkizetini habarlanǵan edi. Saılaý AQSh-tyń Grenlandııany «basyp alý» týraly málimdemeleri aıasynda ótpek.