Slovenııada prezıdenttik saılaý ótti
ASTANA. QazAqparat - Slovenııanyń is basyndaǵy prezıdenti Borýt Pahor prezıdenttik saılaýdyń ekinshi kezeńinde 52,94 paıyz daýys jınap, jeńiske jetti, dep habarlaıdy QazAqparat TASS agenttigine silteme jasap.
Slovenııa memlekettik saılaý komıssııasynyń (MSK) málimetinshe, bıýlletenderdiń 99,98 paıyzy esepteldi. Onyń nátıjesi boıynsha saılaýǵa qatysý 41,74 paıyzdy nemese 715 myń adamdy qurady. Daýys berýge quqyly elektorattyń sany - 1,7 mln. Bul rette MSK daýys berýge jaramsyz 8,8 myń bıýlleten anyqtalǵanyn habarlady.
Aldyn ala nátıjeler jarııalanǵannan keıin 54 jastaǵy Pahor ózine qoldaý bildirgenderge alǵys aıtty. Bıylǵy jyldyń tamyz aıynda ol jańa prezıdenttik merzimge saılaýǵa túsetinin málim etken bolatyn.
Slovenııa parlamenttik respýblıka bolyp tabylady, sondyqtan prezıdenttiń quzyreti shekteýli.
