Slovenııa Vengrııa jáne Horvatııamen shekaraǵa baqylaý qoıdy

Slovenııa memleketi Vengrııa jáne Horvatııamen shektesetin aýmaǵyna kúzet qoıdy. Shekteý on kúnge sozylady. Kazinform bul týraly Euronews basylymyna silteme jasap habarlaıdy. 

Taıaý Shyǵystaǵy jaǵdaı ýshyǵyp jatqanyna alańdaǵan Slovenııa bıligi Horvatııa jáne Vengrııamen shekaraǵa baqylaý engizdi. Onyń resmı sebebi – «lańkestik áreket jáne uıymdasqan qylmyspen kúres».

Shekteý 31 qazanǵa deıin jalǵasady. Buǵan deıin Italııa men Aýstrııa Slovenııamen shekaraǵa baqylaýdy kúsheıtken bolatyn.

«Atalǵan ótkizý pýnktterindegi shekara baqylaýy belgili bir maqsatpen qoıyldy. Ol qoǵamdyq tártipke qaýip tóndiretin, lańkestik áreket jasaýy múmkin nemese Slovenııa Respýblıkasy úshin qaýipti adamdardy anyqtaýǵa baǵyttalǵan», - dep málimdedi slovenııalyq polıtsııa ókili Vılem Toshkan.

Baqylaý kúsheıgendikten Slovenııaǵa kirer tusta kólikter jınalyp qalǵan, onda adamdar 1 saǵattan asa kepteliste tur. Biraq polıtsııa barlyq kólikti teksermeıtindikten bul jaǵdaı uzaqqa sozylmaıdy dep sendirdi.