Slovenııa Prezıdenti Qazaqstanmen yntymaqtastyqtyń basym baǵyttaryn atady

ASTANA. KAZINFORM – Astanaǵa resmı saparmen kelgen Slovenııa Prezıdenti Natasha Pırts-Mýsar Jibek Joly telearnasyna bergen eksklıýzıvti pikirinde eki el arasyndaǵy seriktestikti damytýǵa baǵyttalǵan negizgi salalardy atady.

− Prezıdent Toqaevpen nátıjeli kelissózder júrgizdim jáne biz ekonomıkalyq yntymaqtastyqty jańa deńgeıge shyǵarý qajettigi jóninde ýaǵdalastyq. Múmkindik óte kóp. Jasandy ıntellekt biz damytý qajet salalardyń biri dep sanaımyz. Týrızm de – sondaı mańyzdy baǵyttardyń biri. Oǵan qosa, sý resýrstaryn basqarý máselesi bar. Bul salada Slovenııanyń tájirıbesi mol. Sosyn, árıne, «jasyl» kún tártibi bar. Slovenııa − óte turaqty el. Biz tsırkýlıarlyq ekonomıka boıynsha álemdegi jetekshi elderdiń birimiz. Bul baǵytta Qazaqstanmen tájirıbe almasýǵa daıynbyz, − dedi Natasha Pırts-Mýsar.

Slovenııa Prezıdenti turaqty bıznes-ortanyń ekonomıkalyq ósim úshin negizgi faktor ekenin atap ótti.

− Bul boljamdy salyq saıasatyn bildiredi jáne bul Qazaqstanǵa da, Slovenııaǵa da qatysty. Eger saıası yntymaqtastyq arqyly kóptegen kelisimge qol qoıa alsaq, bul bıznesti damytýǵa myqty negiz qalyptastyrady. Biz dál osy máselemen aınalysýymyz kerek jáne búgin Astanada osy maqsatqa jettik, − dedi Natasha Pırts-Mýsar.

Sondaı-aq, spıker Astanaǵa saparynda úsh yntymaqtastyq týraly memorandýmǵa qol qoıylǵanyn, taǵy ekeýiniń daıyndyq satysynda ekenin habarlady.

− Biz jańa múmkindikterdi ashyp kelemiz jáne qazir 100 mıllıon eýrodan sál asatyn ekijaqty saýda aınalymyn arttyrýǵa úlken áleýet bar ekenine senimdimin, − dep atap ótti Slovenııa Prezıdenti.

Eske sala keteıik, buǵan deıin Qazaqstan-Slovenııa arasynda qandaı qujattarǵa qol qoıylǵanyn habarlaǵan edik.