Slovenııa Izraılge qarsy Halyqaralyq sot isine qosylýdan bas tartty
ASTANA. KAZINFORM – Slovenııa úkimeti Ońtústik Afrıka Respýblıkasy Izraılge qarsy BUU-nyń Halyqaralyq sotynda qozǵaǵan genotsıd isine qosylmaý týraly sheshim qabyldady, dep habarlaıdy Euronews.
Slovenııanyń syrtqy ister mınıstri Tanıa Faıon bul sheshimge ókinish bildirip, úkimetke syrttan qysym bolǵanyn aıtty. Onyń sózinshe, másele boıynsha talqylaý óte kúrdeli ári emotsııalyq jaǵdaıda ótken.
Buǵan deıin Lıýblıana bul protseske qatysýǵa daıyn ekenin bildirgen. Alaıda Nıderland, Islandııa, Vengrııa, AQSh, Fıdjı jáne Namıbııa sııaqty elder iske qosyla bastaǵan kezde Slovenııa pozıtsııasyn ózgertken.
Jergilikti BAQ málimetinshe, bastapqyda premer-mınıstr Robert Golob isti qoldaýǵa beıim bolǵan. Biraq ulttyq qaýipsizdik qyzmetimen konsýltatsııalardan keıin sheshim ózgergen. Mamandar Izraılge qarsy sot isine qosylý eldiń qaýipsizdigine qaýip tóndirýi múmkin ekenin eskertken. Sebebi Slovenııanyń kıberqaýipsizdik júıeleriniń bir bóligi ızraıldik tehnologııalarǵa negizdelgen.
Sonymen qatar Izraıl qurylymdary Slovenııanyń Gaza sektoryndaǵy gýmanıtarlyq operatsııalaryna jáne Taıaý Shyǵystan azamattardy evakýatsııalaýǵa kómektesip otyrǵany aıtyldy.
Tanıa Faıon úkimet halyqaralyq quqyq qaǵıdattaryn qoldaıtynyn, biraq ulttyq qaýipsizdik máseleleri de eskerilgenin atap ótti.
– Mundaı qysymnyń bar ekeni anyq, barlyq elder iri derjavalardyń yqpalyn sezinedi. Biraq bir jaǵynda – prıntsıp, ekinshi jaǵynda ulttyq qaýipsizdik máselesi tur, – dedi mınıstr.
Másele eldegi saıası jaǵdaımen de tuspa-tus kelip otyr. Slovenııada parlament saılaýy qarsańynda janjaldar kúsheıgen. Premer-mınıstr Robert Golob Eýroodaqtan saılaý protsesine syrtqy aralasý boldy degen kúdikke baılanysty tekserý júrgizýdi suraǵan.
Sondaı-aq jarııalanǵan jasyryn vıdeojazbalarda lobbıster men burynǵy sheneýnikterdiń úkimet sheshimderine yqpal etý joldaryn talqylaǵany aıtylǵan.
Quqyq qorǵaýshylar men zertteýshiler bul jazbalardyń artynda Izraıldiń Black Cube barlaý kompanııasy bolýy múmkin ekenin málimdedi. Alaıda Slovenııa demokratııalyq partııasy bul aıyptaýlardy joqqa shyǵaryp, táýelsiz tergeý júrgizýdi talap etti.
Frantsııa prezıdenti Emmanýel Makron da Eýropadaǵy saılaýlarǵa syrtqy aralasý faktileri kóbeıip jatqanyn aıtyp, EO-ny mundaı áreketterge qarsy naqty sharalar ázirleýge shaqyrdy.
Aıta keteıik, Slovenııa eki ızraıldik mınıstrdi persona non grata dep jarııalady.
