Slovenııa eń aýqymdy tabıǵı apatty bastan keshýde

LıÝBLıANA. QazAqparat – 24 saǵatta aılyq jaýyn-shashyn mólsheri túsken Slovenııada qatty sý tasqyny bolyp jatyr. Tótenshe jaǵdaı eldiń jańa tarıhyndaǵy eń úlken tabıǵı apat dep tanyldy, dep habarlaıdy QazAqparat Euronews-ke silteme jasap.

Tolassyz jaýǵan nóserden bolǵan sý tasqynynan kem degende 4 adam qaza tapty. Zalal kólemi 500 mln eýroǵa baǵalanyp otyr.

Ońtústik Eýropada ornalasqan atalǵan elde bir táýlikte aılyq jaýyn-shashyn mólsheri jaýdy. Memleket aýmaǵynyń úshten eki bóligi tabıǵı apattan zardap shekti. Kóptegen ǵımaratty sý basty. Ondaǵan myń úı jaryqsyz qaldy.

Slovenııa premer-mınıstri Robert Golobtyń aıtýynsha, «zaqym kólemi aýqymdy, sebebi Slovenııanyń úshten eki bóligi zardap shekti. Qalypty ómirge qaıta oralý úshin kóp kúsh kerek».

Myńdaǵan adam evakýatsııalanýǵa májbúr boldy, kóptegen turǵyndy tikushaqtar nemese jedel qyzmet mamandary qaıyqtyń kómegimen qutqardy.

Eýropalyq komıssııa tóraǵasy Ýrsýla fon der Lıaıen Slovenııaǵa EO tarapynan kómektesýge ýáde berdi. Slovenııa úkimeti NATO-ǵa kómek surap júgindi: áskerı tikushaqtar men jınalmaly kópirler jiberýdi ótindi.