Slovakııany tuńǵysh ret áıel prezıdent basqarady
BRATISLAVA. QazAqparat - Slovakııada 45 jastaǵy advokat Zýzana Chapýtova prezıdent saılaýynyń ekinshi týrynda jeńiske jetip, memleket basshysy laýazymyna saılandy, dep habarlaıdy «QazAqparat» HAA TASS agenttigine silteme jasap.
Ol 1993 jyly táýelsiz el atanǵan Slovakııanyń besinshi prezıdenti ári el tarıhyndaǵy tuńǵysh áıel prezıdent boldy.
Oǵan prezıdent ókiletttigi 15 maýsym kúni Andreı Kıskadan aýysady.
Z. Chapýtovaǵa ekinshi týrǵa qatysqan saılaýshylardyń 58,4% daýys bergen. Ásirese ony Bratıslava qalasy men Bratıslava ólkesiniń turǵyndary qoldaǵan (73,74%).
Saılaýǵa 5,44 mln turǵyny bar el saılaýshylarynyń 41,8%-y qatysqan.
Zýzana Chapýtova 1973 jylǵy 21 maýsymda Bratıslavada týǵan, sondaǵy Komenskıı atyndaǵy ýnıversıtettiń zań fakýltetin bitirgen.
Z. Chapýtova zańger dıplomyn alǵan soń advokat bolyp jumys istegen. Ol negizinen áıelder men balalardy, memlekettik jáne kommertsııalyq kompanııalardyń qyzmetkerleriniń quqyqtaryn qorǵaýmen aınalysqan.
