Slovakııada ushaq qulady: qaza tapqandar bar

ASTANA. KAZINFORM — Qaıǵyly oqıǵa Slovakııanyń ońtústiginde, Nove Zamkı eldi mekeniniń janyndaǵy Kamennyı Most aýylynda boldy, dep habarlaıdy Kazinform agenttiginiń tilshisi.

Jergilikti BAQ málimetinshe, apat senbi kúni tústen keıin, shamamen saǵat 14:00-de bolǵan. Eki adam otyrǵan shaǵyn sporttyq ushaq bıiktigin joǵaltyp, eki angardyń arasyna qulaǵan.

Qutqarýshylar dereý oqıǵa ornyna jetken. Biraq eki adam sol jerde qaza tapqan: 41 jastaǵy ushqysh, kásibı áskerı qyzmetker jáne 32 jastaǵy er adam. Qutqarýshylardyń jedel áreketine qaramastan, kelgen dáriger olardyń ekeýiniń de kóz jumǵanyn rastady. Qazirgi ýaqytta oqıǵanyń mán-jaıy anyqtalyp jatyr.

Ushaq ıesiniń otbasyna arnalǵan ekskýrsııa bolýy múmkin degen boljam bar.

Eske sala keteıik, bıylǵy jazda Qazaqstanda eki shaǵyn áýe kemesiniń apaty tirkelgen bolatyn.