Slovakııada qazaqstandyq stýdentterdiń ne úshin ustalǵany belgili boldy
ASTANA. KAZINFORM — Slovakııanyń Trenchın qalasynda polıtsııa Qazaqstannyń tórt azamatyn ustady. Slovakııanyń TV Markíza telearnasynyń habarlaýynsha, olar jergilikti ýnıversıtette oqıdy. Aldyn ala málimetke qaraǵanda, jastar ózderin polıtseı retinde tanystyryp, qala turǵynynan aqsha almaq bolǵan.
Jastar jergilikti turǵyndy izdep, onyń ájesiniń úıine barǵan. Áıeldiń aıtýynsha, olar betterin balaklavamen jaýyp, ústine Slovakııanyń Ulttyq qylmys agenttiginiń (NAKA) ataýy jazylǵan qara kıim kıgen. Ózderin polıtseı dep tanystyrǵan olar áıeldiń úıin tintken. Keıin er adamdy taýyp, ony uryp-soqqan bolýy múmkin.
Áıel ózin polıtseı dep tanystyrǵan adamdardyń áreketine shaǵymdanbaq bolǵanda, olardyń polıtsııa qyzmetkeri emes ekeni anyqtalǵan. Keıin oqıǵaǵa qatysy bar degen kúdikpen 18 ben 21 jas aralyǵyndaǵy tórt adam ustaldy. Taǵy bireýi qashyp ketken.
Stýdentterdiń biriniń advokatynyń aıtýynsha, onyń qorǵaýyndaǵy azamatqa adamdar tobymen birlesip, bopsalaý maqsatynda adam urlady degen aıyp taǵylǵan. Alaıda qorǵaýshy tarap aıyptaý nusqasymen kelispeıdi.
Aıyptalýshylardy qamaýǵa alý týraly ótinishti sot 20 qarashada qaraýy kerek bolǵan. Ázirshe sot sheshimi týraly aqparat jarııalanǵan joq.
Eske salaıyq, munyń aldynda QR Syrtqy ister mınıstrligi Slovakııada Qazaqstannyń tórt azamaty ustalǵanyn rastaǵan edi.
Vedomstvo Kazinform saýalyna bergen jaýabynda atalǵan jaǵdaıdan habardar ekenin málimdedi.
— Ustalǵan azamattarǵa konsýldyq-quqyqtyq kómek kórsetilip jatyr. Olardyń týystarymen baılanys ornatyldy. Bul jaǵdaı Syrtqy ister mınıstrliginiń baqylaýynda, — delingen resmı jaýapta.