Slovakııada eki poıyz soqtyǵysty: zardap shekkender bar

ASTANA. KAZINFORM — Slovakııa astanasy Bratıslava qalasynyń mańynda eki poıyz soqtyǵysyp, biraz adam zardap shekken. Bul týraly VVS habarlady.

Oqıǵa Bratıslava men Pezınok qalalary arasyndaǵy, astanadan soltústik-shyǵysqa qaraı 20 shaqyrym jerde bolǵan.

Eldiń Іshki ister mınıstri Matýsh Shýtaı-Eshtok oqıǵa ornyna baryp, ondaǵan adamnyń jeńil jaraqat alǵanyn málimdedi. Aldyn ala málimet boıynsha, qaza tapqandar joq. 11 adam aýrýhanaǵa jetkizilgen. Dárigerler jaraqat alǵandardyń qatary artýy múmkin ekenin aıtty.

Vagondarda shamamen 800 adam bolǵan.  Astana mańyndaǵy mańyzdy temirjol ýchaskesinde qozǵalys ýaqytsha toqtatyldy.

Aldyn ala aqparat boıynsha, poıyzdar betpe-bet soqtyǵyspaǵan jáne relsten shyǵý faktisi de tirkelmegen. Bul jóninde polıtsııanyń málimdemesine súıenip, Reuters agenttigi jazdy.

Reuters agenttigi deregine súıensek, bul Slovakııada sońǵy bir aı ishindegi ekinshi temirjol apaty. 13 qazanda eldiń shyǵysynda eki poıyz soǵysyp, 91 adam jaraqat alǵan edi.

Oǵan deıin Meksıkada poıyz avtobýspen soqtyǵysyp, saldarynan 10 adam qaza taýyp, 61 adam jaraqat alǵanyn jazdyq.