Slovakııada burynǵy premerlerdiń jeńildikterine qatysty referendým ótpeı qaldy
ASTANA. KAZINFORM — Slovakııada burynǵy premer-mınıstrlerge ómir boıy tólenetin zeınetaqyny alyp tastaý jáne sybaılas jemqorlyqqa qarsy qurylymdardy qaıta qurý máseleleri boıynsha ótken referendým saılaýshylardyń tómen qatysýyna baılanysty ótpedi, dep habarlaıdy DW.
Eldiń Ortalyq saılaý komıssııasynyń málimetinshe, 2026 jylǵy 5 shildede ótken daýys berýge saılaýshylardyń nebári 16,13 paıyzy, ıaǵnı shamamen 705 myń adam ǵana qatysty. Al zań boıynsha referendýmnyń jaramdy dep tanylýy úshin saılaýshylardyń 50 paıyzdan astamy daýys berýi qajet.
Soǵan qaramastan daýys bergenderdiń basym bóligi eki bastamany da qoldady. Burynǵy premer-mınıstrler men joǵary laýazymdy memlekettik qyzmetkerlerge ómir boıy tólenetin tólemdi alyp tastaýdy qatysýshylardyń 93,43 paıyzy qoldasa, Arnaıy prokýratýra basqarmasy men Ulttyq qylmystyq agenttikti qaıta qurýdy 92,23 paıyzy jaqtady.
Referendýmdy parlamentte ókildigi joq «Demokrattar» partııasy bastamashylyq etti. Buǵan 2024 jyly qabyldanǵan túzetýler sebep boldy. Atalǵan ózgeristerge sáıkes, eki nemese odan da kóp merzim premer-mınıstr ne parlament spıkeri bolǵan tulǵalarǵa aı saıyn 4 myń eýrodan astam ómir boıǵy tólem qarastyrylǵan. Bul talapqa qazirgi premer-mınıstr Robert Fıtso de sáıkes keledi.
Daýys berýdiń ekinshi máselesi Robert Fıtso úkimeti kezinde taratylǵan Arnaıy prokýratýra basqarmasy men Ulttyq qylmystyq agenttikti qaıta qalpyna keltirýge qatysty boldy. Bul qurylymdardyń jabylýy elde jappaı narazylyqtarǵa jáne oppozıtsııanyń qatań synyna sebep bolǵan edi.
Eske salaıyq, Robert Fıtso 2023 jyly qaıtadan Slovakııa premer-mınıstri qyzmetine kirisken bolatyn.
Aıta ketelik Slovakııada tarıhyndaǵy onynshy referendým ótip jatqany týraly jazǵan edik.
