Slovakııada aýsyl indeti qaıta órshidi

ASTANA. KAZINFORM — Slovakııada aýsyl indetiniń jańa oshaǵy anyqtalyp, bul jaǵdaı eldegi fermerler men bılik ókilderiniń alańdaýshylyǵyn týǵyzyp otyr, dep jazady AZERTADJ.

Slovakııa Aýyl sharýashylyǵy mınıstrliginiń málimeti boıynsha, alǵashqy aýrý juqtyrý jaǵdaılary eldiń batysyndaǵy Trnava aımaǵyndaǵy fermalarda tirkelgen. Veterınarlyq qyzmetter iri qara mal men shoshqalardan vırýstyń bar ekenin rastady.

Qazirgi ýaqytta birneshe ınfektsııalyq oshaq anyqtalyp, zardap shekken aımaqtarda karantın sharalary engizildi. Bul óńirlerden mal men mal sharýashylyǵy ónimderin tasymaldaýǵa ýaqytsha tyıym salyndy. Veterınarlar janýarlardy jappaı vaktsınatsııalap, kórshi elder — Chehııa, Majarstan jáne Aýstrııamen shekaradaǵy baqylaýdy kúsheıtýge kóshti.

Aýsyl — iri qara, shoshqa jáne basqa da qos tuıaqty janýarlarǵa juǵatyn jiti vırýstyq aýrý. Bul dert adamǵa qaýipti emes, alaıda aýyl sharýashylyǵyna zor ekonomıkalyq shyǵyn keltiredi.

Fermerler indet saldarynan maldy joıý men eksporttyń toqtaýy qarjylyq shyǵynǵa alyp keledi dep qaýiptenedi. Eýropalyq komıssııa Slovakııaǵa qajetti kómek kórsetýge daıyn ekenin bildirdi. Sarapshylar halyqty veterınarlyq talaptardy saqtaýǵa jáne dúrbeleńge boı aldyrmaýǵa shaqyryp otyr. Bılik ókilderi jaǵdaı baqylaýda ekenin málimdedi.

Buǵan deıin Túrkııada aýsyl indeti taralyp, Ylǵyndaǵy mal bazary jabylyp, karantın engizilgeni belgili boldy.