Slovakııa Premer-mınıstri naýbaıhanada túngi aýysym kýreri bolyp jumys istedi
ASTANA. KAZINFORM – Slovakııa Respýblıkasynyń premer-mınıstri Robert Fıtso 1 mamyr kúni túngi aýysymda naýbaıhanada kýrer bolyp jumys istedi. Bul týraly slovakııalyq Plus jeden den gazeti habarlady.
Premer-mınıstr 1 mamyrǵa qaraǵan túni «Banov» naýbaıhanasynan ónim tasymaldaýmen aınalysty. Ol paıdaly iske úles qosqanyna qýanyshty ekenin aıtyp, nan ónimderin Trenchın óńiri aýmaǵynda jetkizgenin atap ótti.
– Eger bárin taratyp úlgersek, menimen birge júretin júrgizýshige sál jeńilirek bolady, – dedi Robert Fıtso aýysym bastalar aldynda.
Onyń aıtýynsha, mundaı eńbek – túnde nemese mereke kúnderi jumys isteıtin adamdarǵa qurmet bildirýdiń bir tásili. Premer-mınıstrdiń jumysy tań atqansha jalǵasqan.
Sonymen qatar premer-mınıstr eldegi jumyssyzdyq deńgeıi Slovakııa tarıhyndaǵy eń tómengi kórsetkishke jetkenin aıtty. Degenmen respýblıkada túngi jáne artyq jumys isteý keń taralǵanyn atap ótti.
Onyń málimetinshe, jumys kúshiniń shamamen 11%-y túngi ýaqytta eńbek etedi, bul kórshi eldermen salystyrǵanda aıtarlyqtaı joǵary kórsetkish. Ol sotsıal-demokratııalyq partııa túngi aýysymdaǵy eńbekke laıyqty aqy tóleýdi qoldaıtynyn jetkizdi.
Aıta keteıik, buǵan deıin Polshada 5 jylda jumyssyzdyq deńgeıi artyp ketkenin jazdyq.
