Slovakııa Premer-Mınıstri Qazaqstanǵa resmı saparmen keledi
ASTANA. QazAqparat - 14-16 qarasha kúnderi Slovakııa premer-mınıstri Peter Pellegrını Astanaǵa resmı saparmen keledi, dep habarlaıdy QazAqparat tilshisi.
Bul týraly QR SІM-de ótken brıfıngte vedomstvonyń resmı ókili Aıbek Smadııarov málimdedi.
Atalǵan sapar eki memleket arasyndaǵy qarym-qatynastar tarıhynda slovak úkimetiniń basshysy deńgeıindegi alǵashqy sapar bolmaq.
"Sapar aıasynda Peter Pellegrınıdiń Qazaqstan Prezıdentimen jáne Premer-Mınıstrimen kezdesýleri jáne Qazaqstan-Slovakııa bıznes forýmyna qatysýy josparlanýda. Slovakııa Qazaqstandy Ortalyq Azııada aldyńǵy qatardan oryn alatyn, ekonomıkasy serpindi damyǵan jáne mańyzdy áriptes retinde qarastyrady. Bratıslava ózara tıimdi saýda-ekonomıkalyq jáne ınvestıtsııalyq yntymaqtastyqty damytýǵa turaqty qyzyǵýshylyq tanytyp otyr", - dedi Aıbek Smadııarov QR Syrtqy ister mınıstrliginde ótken aptalyq brıfıngte.
Óz kezeginde Slovakııanyń tranzıt-kóliktik mashına jasaý, áskerı-tehnıkalyq ónerkásip, ınnovatsııalyq tehnologııa salalary elimiz úshin aıtarlyqtaı qyzyǵýshylyq týdyrady.
Qarjy mınıstrliginiń málimetine sáıkes, 2018 jyldyń qańtar-tamyz aılaryndaǵy ekijaqty saýda aınalymy 33,5 mln AQSh dollaryn qurady.
Foto: tass.ru
