Slovakııa Qazaqstannyń orman sharýashylyǵy mamandarynyń biliktiligin arttyrmaq
ASTANA.KAZINFORM – Qazaqstannyń Slovakııadaǵy Elshisi Janna Saǵynova Slovak Respýblıkasy Aýyl sharýashylyǵy mınıstrliginiń memlekettik hatshysy Vladımır Vnýkpen kezdesý ótkizdi.
QR Syrtqy ister ınıstrligi baspasóz qyzmetiniń habarlaýynsha, taraptar kelissózder barysynda agrarlyq saladaǵy ekijaqty yntymaqtastyqtyń keń aýqymdy máselelerin, sonyń ishinde mal sharýashylyǵy, tuqym sharýashylyǵy jáne orman sharýashylyǵyna qatysty máselelerdi talqylady. Sondaı-aq Slovakııadan asyl tuqymdy mal satyp alý, Qazaqstannyń Slovakııa naryǵyna jetkiziletin eksporttyq agroónim túrlerin keńeıtý máselelerine erekshe nazar aýdaryldy.
Orman sharýashylyǵy salasyndaǵy ózara túsinistik týraly birlesken Memorandýmdy iske asyrýdyń mańyzdylyǵy, sondaı-aq saýda-ekonomıkalyq jáne ǵylymı-tehnıkalyq yntymaqtastyq jónindegi Úkimetaralyq komıssııa aıasynda jumys isteıtin beıindi jumys tobynyń qyzmeti atap ótildi.
2025 jylǵy aqpanda ótken jumys tobynyń onlaın-kezdesýiniń qorytyndylary boıynsha qol jetkizilgen kelisimderdi júzege asyrý maqsatynda dıplomat Qazaqstannyń orman sharýashylyǵy mamandary úshin Slovakııa Respýblıkasynyń mamandandyrylǵan oqý oryndary bazasynda taǵylymdamalar uıymdastyrý múmkindigin, sondaı-aq QR Aýyl sharýashylyǵy mınıstrliginiń Orman sharýashylyǵy komıteti men Slovakııanyń Ulttyq orman ortalyǵy arasyndaǵy ózara is-qımyldy damytý máselesin qarastyrýdy usyndy.
Bıotehnologııalar, topyraqtaný, ósimdik selektsııasy men genetıkasy, mal sharýashylyǵy jáne veterınarııa salalaryndaǵy birlesken jobalardy iske asyrý perspektıvalaryna erekshe nazar aýdaryldy.
Elshi Qazaqstannyń Ulttyq agrarlyq ǵylymı-bilim berý ortalyǵynyń qyzmetimen tanystyryp, atalǵan ortalyq pen Slovakııanyń Ulttyq aýyl sharýashylyǵy jáne azyq-túlik ortalyǵy, sondaı-aq Bratıslavadaǵy Ortalyq baqylaý jáne synaq aýyl sharýashylyǵy ınstıtýty arasyndaǵy yntymaqtastyqty jolǵa qoıýdy usyndy.
ıÝNESKO-nyń saıatshylyq ónerin Qazaqstan men Slovakııanyń materıaldyq emes mádenı murasy retinde tanýy ekijaqty yntymaqtastyq úshin jańa múmkindikter ashatyny atap ótildi.
Dıplomattyń pikirinshe, Slovakııada suńqarshylyqty kásibı oqytýmen aınalysatyn orman mektepteri jelisiniń bolýy qazaq qusbegilerin daıarlaý úshin qosymsha múmkindikter beredi.
Kezdesý qorytyndysy boıynsha taraptar yntymaqtastyqty odan ári damytýǵa ózara múddeliligin rastady jáne talqylanǵan barlyq baǵyttar boıynsha syndarly dıalogty jalǵastyrýǵa kelisti.
Osyǵan deıin Chehııa jáne Slovakııa arhıvterinen Álıhan Bókeıhanǵa qatysty tyń derekter tabylǵany týraly jazdyq.
