Slovakııa Qazaqstannyń áleýmettik qoldaýdyń tsıfrlyq modelin joǵary baǵalady
ASTANA. KAZINFORM - Qazaqstannyń Slovakııadaǵy Elshisi Janna Saǵynova Slovak Respýblıkasyndaǵy Adam quqyqtary jónindegi ýákili Robert Dobrovodskıımen kezdesti, dep habarlaıdy QR Syrtqy ister mınıstrliginiń baspasóz qyzmeti.
Kezdesý barysynda adam quqyqtaryn qorǵaýdyń ózekti máseleleri jáne eki eldiń ulttyq quqyq qorǵaý ınstıtýttary arasyndaǵy yntymaqtastyqty damytý perspektıvalary talqylandy.
J.Saǵynova Qazaqstan Prezıdenti Qasym-Jomart Toqaevtyń bastamasymen júzege asyrylyp jatqan «Ádiletti Qazaqstan» tujyrymdamasy aıasyndaǵy aýqymdy saıası jáne ınstıtýtsıonaldyq reformalar týraly aqparat berdi. Bul reformalar demokratııalyq ınstıtýttardy nyǵaıtýǵa, zań ústemdigin qamtamasyz etýge jáne adam quqyqtaryn qorǵaýdy kúsheıtýge baǵyttalǵany atalyp ótti.
Sonymen qatar bıyl 15 naýryzda Respýblıkalyq referendým nátıjesinde qabyldanǵan elimizdiń jańa Konstıtýtsııasyna erekshe nazar aýdaryldy. Ata zańnyń ázirlenýine azamattardyń keńinen qatysqany onyń jalpyulttyq mánge ıe bolýyna negiz bolǵanyna toqtala kele, basty basymdyqtardyń biri – adam quqyqtary men bostandyqtaryn qorǵaýdyń konstıtýtsııalyq kepildikterin kúsheıtý negiz bolǵany málimdeldi.
Elshi slovak tarapyn Qazaqstanda áleýmettik salany jańǵyrtý baǵytymen, onyń ishinde Áleýmettik kodekstiń qabyldanýy, áleýmettik qoldaý kórsetý júıesi jáne qyzmetterdi proaktıvti túrde usynýǵa negizdelgen jańa modelimen tanystyrdy.
R.Dobrovodskıı júzege asyrylýdaǵy áleýmettik qoldaýdyń tsıfrlyq platformasyna erekshe qyzyǵýshylyq tanytty. Ombýdsmen bastamalardyń praktıkalyq mańyzyn joǵary baǵalap, ásirese Otbasynyń tsıfrlyq kartasy jobasy Slovakııada zerdeleýge jáne ony qoldanysqa engizý múmkindigin qarastyrýǵa laıyq tájirıbe ekenin atap ótti.
-Taraptar Qazaqstandaǵy Adam quqyqtary jónindegi ýákil ınstıtýtynyń qyzmetine, onyń konstıtýtsııalyq mártebesiniń bekitilýi, ókilettikteriniń keńeıtilýi jáne halyqaralyq uıymdarmen yntymaqtastyǵynyń nyǵaıýy jóninde pikir almasty,-delingen habarlamada.
Osyǵan deııin Slovakııa Qazaqstannyń orman sharýashylyǵy mamandarynyń biliktiligin arttyratyny týraly jazdyq.
