Slovakııa eks-Prezıdenti Qazaqstandaǵy reformalardy quptady

NUR-SULTAN. QazAqparat – Slovak Respýblıkasynyń eks-Prezıdenti Ivan Gashparovıch Qazaqstanda iske asyrylyp jatqan reformalar kýrsyn quptap, olar elimizdiń odan arǵy údemeli damýyn qamtamasyz etedi dep paıymdady. Buny Slovakııany 2004-2014 jyldary basqarǵan I. Gashparovıch búgin ótken Qazaqstannyń Bratıslavadaǵy Elshisi Roman Vasılenkomen kezdesýi barysynda aıtty.

Bul týraly QR SІM baspasóz qyzmeti habarlady.

I. Gashparovıch Qazaqstanǵa 2010 jyly eki ret saparmen kelgen – birinshi resmı saparmen, keıin – EQYU sammıtine qatysý úshin. 2007 jyly ol Slovakııa astanasynda Qazaqstannyń Tuńǵysh Prezıdenti – Elbasy Nursultan Nazarbaevty memlekettik saparmen qabyldady. Slovakııa Prezıdenti retindegi ókilettigin tapsyrǵannan keıin, quqyqtanýshy, ǵalym, quqyqtaný salasyndaǵy kóptegen kitaptar men oqýlyqtardyń avtory I. Gashparovıch ǵylym salasyna jáne Komenskı Ýnıversıtetinde quqyqtaný páninen sabaq berýge qaıta oraldy.

Eks-Prezıdent kezdesýde atap ótkendeı, ol Qazaqstanǵa jasaǵan saparlaryn jyly shyraımen eske alady, osy jyldar boıy eldiń damýyn baıqap, onyń jetistikterine tańdanýda. Prezıdent Qasym-Jomart Toqaev baıandaǵan saıası jáne áleýmettik-ekonomıkalyq reformalar kýrsyn quptap, I. Gashparovıch quqyq ústemdigin nyǵaıtýdyń, adam quqyqtaryn qorǵaýdyń, ınvestıtsııalyq klımatty jetildirýdiń erekshe ózektiligi men mańyzdylyǵyn atap ótti. Bunyń bári ishki ekonomıkalyq ósimdi yntalandyrýmen qatar basqa elderdiń iskerlik toptarymen yntymaqtastyqty keńeıtý úshin aıtarlyqtaı áser etýi tıis.

Eki el arasyndaǵy osyndaı yntymaqtastyqty keńeıtýdiń áleýeti ónerkásip, sonyń ishinde avtomobıl jasaý, dızaın jáne jobalaý, aýyl sharýashylyq ónimderin qaıta óńdeý, aqparattyq tehnologııalar, sonymen qatar kólik jáne logıstıka salalarynda bolýy múmkin.

Óte jyly atmosferada ótken kezdesýdiń qorytyndysy boıynsha I. Gashparovıch Qazaqstan basshylyǵy men halqyna tolaǵaı tabys pen gúldenýdi tiledi.