Slovakııa álemde birinshi bolyp temeki tuqylynan jol salady
Dúnıejúzinde kún saıyn tutylatyn 18 mlrd temeki tuqylynyń úshten biri ǵana qoqys jáshigine nemese qaıta óńdeý konteınerine túsedi. Slovakııa olardy kádege jaratýdyń jańa ádisin tapty. Kazinform bul týraly Euronews-ke silteme jasap habarlaıdy.
Slovakııa astanasyndaǵy kommýnaldyq qaldyqtardy basqarý kompanııasy qaldyq jınaý jáne qaıta óńdeý boıynsha ınnovatsııalyq jobany iske qosty.
Qaladaǵy rojdestvo jármeńkesi kezinde standartty temeki súzgilerin, zamanaýı temeki túrlerin jáne veıp jınaýǵa arnalǵan arnaıy konteınerler synaqtan ótti.
Qala bıligi bul materıaldy asfalt jasaýǵa paıdalanýdy josparlap otyr.
Bılik bul kóshelerdi taza ustaýǵa jáne qaldyqtardy tıimdi paıdalanýǵa septigin tıgizedi dep úmittenedi.
Bratıslavadaǵy Odvoz a Likvidácia Odpadu (OLO) kommýnaldyq qaldyqtardy basqarý kompanııasy 2024 jyldan bastap qoǵamdyq orynda temeki tuqylyna arnalǵan konteıner ornatylatynyn aıtty.
Qaıta óńdeýdiń ózi jańalyq bolmasa da, temeki tuqylyna arnalǵan konteınerler álem boıynsha birinshi ret qoldanylmaqshy.
SPAK-EKO jáne EcoButt kompanııalary birlesip, temeki qaldyqtarynan asfalt jasaýdy qolǵa aldy.
— Kópshilik oryndarǵa, festıval, jarys, bazar nemese basqa da qalalyq is-sharalarǵa kelýshiler temeki tuqylyn arnaıy konteınerge tastasa, olar qorshaǵan ortany tazartýǵa ǵana emes, qaldyqtyń osy túrin joıýǵa da úles qosar edi, — dedi OLO kompanııasynyń aınalmaly ekonomıka menedjeri Martına Chehova.
